聖誕檔期可謂遊戲商必爭黃金時段之一，尤其對於向亞洲地區全力發動攻勢嘅XBOX，所以微軟已安排多款大作十二月登場，務求以勁Game盡搶市場佔有率。今日就請嚟一班XBOX機主，親身試玩XBOX三大勁作，睇吓XBOX能否藉此提升在港嘅聲勢。
記者、攝影：徐影龍
其實在今年度東京遊戲展中，XBOX攤位除派發一隻有多款將推出大作影像嘅DVD外，重曾經大派新Game試玩碟，入面包含2002年度四大壓軸勁Game，除XBOXGameStuio重頭作《Blinx》外，重有世嘉久別再臨大作《PanzerDragonORTA》、FromSoftware動作Game《O.TO.GI～御伽～》及光榮嘅《紅之海》。四隻Game入面有啲重係由日本開發商製作，而且港版XBOX制式為NTSC/J，完全對應日版遊戲，話唔定好快會推出相應行貨，故此對香港玩家有一定吸引力。由於《Blinx》較早前已推出美版，故今次重點試玩其餘三款作品。
Partick（機齡10年）
好早時我已經有部XBOX，由於我本身玩開電腦Game，對美式遊戲情有獨鍾，所以XBOX可以話幾啱我口味，由當初嘅《HALO》到新出嘅《超時空要塞》我都有捧場。今次我就揀咗世嘉隻《PanzerDragonORTA》嚟試玩，因為舊作口碑實在太好，好多機迷都期待今次喺XBOX上嘅表現。
試玩過後真係好興奮，今次由RPG玩法回歸番立體射擊，過程令人感到好爽快同刺激，背景靚同巨大首領級敵人都好有氣勢，兼且完全保留到舊作嘅神髓，包括360°多方向攻擊、目標鎖定一次過攻擊系統等，最正係今集可自由變換飛龍形態，配合唔同環境作出攻擊，話唔定好似RPG版本咁有飛龍最終形態㖭。而且今集有成十關咁多，真係有排玩。
期待度：★★★★★
遊戲類型：立體射擊
遊玩人數：1人
開發商：世嘉
推出日期：暫定12月
(C)SEGACORPORATION2002
Kenny（機齡7年）
當初以為係《真‧三國無雙》嘅科幻版，玩落先發覺係完全另一回事，除咗控制主角開槍同斬殺敵人外，遊戲入面重有四位拍檔幫手，一齊衝鋒陷陣，由於遊戲以大量敵人出現為賣點，最多會有1,000個敵人同時出現，玩家需要靈活運用其獨有嘅GroupControlEngine系統，讓拍檔發揮最大功用，尤其係試玩版中嘅首領，除向四方噴火外，重會不斷咁放好多怪蛋出嚟，每個怪蛋又會爆好多細細隻嘅怪獸仔，稍一鬆懈就會全個畫會都係敵人，更難對付。
試玩版只得一關，又係唔可以補充能源，要打第四次先可以搞掂埋大佬過關。總括嚟講遊戲只着重反應，唔會有任何解謎要素，適合只求殺敵快感而唔想用腦嘅玩家。
期待度：★★★☆☆
遊戲類型：立體射擊
遊玩人數：1人
開發商：光榮
推出日期：暫定12月
(C)2002KOEICo.,Ltd.
阿候（機齡5年）
我就較為欣賞FromSoftware隻《O.TO.GI～御伽～》，因為我偏向鍾意斬殺型嘅動作遊戲，而呢隻Game就畀到我周圍殺敵嘅快感，加上主角型到爆，又識飛天又有必殺技，大部份建築物都可以一刀斬爛，玩得好開心暢快，可以拍得住PS2隻《DevilMayCry》。主角嘅攻擊模式又多變，除法術同斬殺外，重有連續技，飛天時尤其重要，因為好多寶物都喺好高嘅地方，有時要運用空中連續技嘅停留時間，再一口氣Dash到目的地，都幾考功夫㗎。
試玩版中嘅關數需要搵齊聖杯先可以過關，敵人又會不斷咁出現，緊張刺激之餘重要留心搵齊寶物，可惜試玩版打極都冇補能源嘅道具，稍為難玩咗啲，希望正式版推出時唔好咁難玩喇。
期待度：★★★★☆
遊戲類型：立體動作
遊玩人數：1人
開發商：FromSoftware
推出日期：12月12日
(C)2002FromSoftware,Inc
Allrightsreserved.