數碼相機係一股潮流，如果大家手上稍有餘錢，試問有邊個唔想整部玩？最近香港SONY公布會在11月推出兩部全新機種，F77就力Sell高畫質、300°旋轉鏡頭，U20就大賣細部SnapShot機王，相信一眾SONYFans，又多兩個買機嘅「煩惱」。
記者、攝影：朱崇德
第一眼望見呢部F77，馬上令人諗番起SONY部大眼仔Notebook，感覺有如一個經典嘅延續；全機焦點係鏡頭部份，它可以作300°自由旋轉，想攞個靚角度真係好方便。鏡頭組件用番SONY合作開嘅蔡司鏡頭，還加入了SONY新開發的3.5倍智能變焦功能，據稱有助放大變焦拍攝，令相片更細緻，微粒更幼細。
感光元件使用了400萬像素的SuperHADCCD（1/1.8吋），對一般民用玩家，真係大到有「找」！A3尺寸的相片打印都輕而易舉。拍攝模式主要分為全自動、程式及預設場景模式，唯獨欠缺手動模式，對進階用家可能會感到有點點不足，幸好多點測光同閃光燈設置非常準。F77在11月8日喺SONY香港官方網站接受預訂，如果想第一時間出機就要頻頻上去昅實啦！
早兩個月前SONY推出U10時，好多買家都話得嗰百零萬像素好似唔多夠使，估唔到SONY咁快從善如流，馬上公布推出佢嘅Upgrade版U20。
機身保持一貫嘅「至細」（84.5×39.8×28.6mm），重量亦只係87克！感光元件就提升至211萬像素嘅SuperHADCCD。機身顏色起用更Cool嘅深藍、銀及黑等，相對舊版嘅粉調色，感覺更專業！U20會在11月1日開始接受預訂。
網址：
SONY24小時客戶服務熱線：23452966