立法會教育事務委員會噚日開會，本來應係教育統籌局局長李國章出嚟受靶，點知佢上周五突然通知立法會，因私人事務而請咗兩個星期大假離港，撇低常任秘書長羅范椒芬應付班麻煩嘅議員！
噚日講局署合併，議員楊耀忠話希望合併後，遇有人事調動時通知立法會，「飯焦」嗰時已經唔多耐煩，猛咁fing筆；點知張文光重插口附和，搞到「飯焦」即刻扯晒火：「我諗應該睇清楚呢個會嘅權責，如果連部門行政都理埋，我諗你哋會要開好多會！」點解「飯焦」咁大火？可能係放假放得唔開心，因為佢喺會上自爆話，前日人哋放假，佢就喺屋企為咗公務同同事猛通電郵，噚日晨咁早八點半就要去開會；重俾老細撇低，唔扯火就有鬼啦！
傳真︰2623-9278
電郵︰