新落成嘅住宅，大都有會所，究竟住客最鍾意乜嘢設施呢？泳池，答對；健身室，又啱。重有呢？原來係麻雀房。
嘉里喺中半山嘅豪宅譽皇居，會所就整咗個麻雀房。嘉里物業代理執行董事朱葉培講，會所既然可以有畀外籍住戶玩啤牌嘅房間，咁都好應該照顧吓本地人嘅喜好。
呢個構思，其實係住戶同管業公司員工傾偈時反映意見嘅結果。睇嚟管業公司都要同住戶多啲溝通吓。
除咗呢個盤，嘉里北角縉景臺，同深井縉皇居會所都有麻雀房。
住戶約朋友嚟自己屋苑會所攻打四方城，好過去酒樓雀局，咁都係一種身份象徵。
另外，中半山有大批出租豪宅嘅嘉里建設，好少大事宣傳。
原來發展商平時會為住戶搞啲遠足之類嘅活動，管接管送，又有人帶隊，服務咁好，住戶自然會主動向朋友推介啦。
地產代理為做成生意，不惜送定到內地，但多數係深圳同廣州等較近嘅地方多，不過，今次就送到去廈門。
中原海逸豪園分行經理鮑志德話，業主成日到處飛，咁啱知道業主到咗廈門，所以佢就親自送定金去廈門佢寫字樓，結果做成海逸豪園單生意。
呢個單位千四呎，成交價五百五十萬。估計鮑志德可收五萬五蚊佣金，不枉佢千里迢迢送定金上廈門。
新鴻基地產對自己嘅產品信心十足，所以每次有樓盤落成交樓，都會邀請記者去睇樓，重會任記者揀個單位嚟睇，以示公正。呢股風氣都吹到內地。
深圳發展商百仕達集團，為即將入伙嘅百仕達花園第三期「君逸華府」，邀請港深兩地多位地產界名人與專家，到場一齊驗收物業。呢個做法可能成為個盤嘅賣點之一。但係獲邀嘉賓，會唔會有畀面派對成份呢？
每逢假日，好多人興周圍去睇樓，而且有北上趨勢。𠵱家一過羅湖海關，就見幾個樓盤擺檔，招攬港人去睇樓，有專車接送，同香港冇乜分別。
蘭西朋友有內地睇樓經驗，佢話可以消磨時間，又可以順便喺附近搵好嘢食，呢啲都係唔少港人嘅心態。
最近有旅行社搞優惠團，到內地玩之餘，重帶隊去睇中國海外華僑城附近嘅深圳灣畔。啲客睇完話個盤幾正喎。話唔定發展商日後會搞埋睇樓團。本港發展商要小心啲嘞。
業內人士估計，補地價近六十億嘅新地西貢十四鄉發展項目有新進展。地政總署副署長（專業事務）郭理高同蘭西講，雙方就新地負責修建部份路面建築費計法達協議，工程費用會喺補地價中扣除。下一步就到戲肉，即係修改地契及計算補地價。
佔地近七十四公頃的十四鄉住宅計劃，總樓面近六百萬方呎。城規會批建三十九幢分層住宅及二十八幢獨立屋，總共有五千六百多個單位。業內人士估計，補地價近六十億元。呢個項目重係新地咁多年嚟最大單補地價個案。
蘭西
電郵地址：