小初前度愛股唯冠國際（334），臨公布業績前，遭到大幅拋售。傳聞業績唔對辦，故此遭基金拋售。
唯冠最低見0.335元，收0.34元，成交股數有成1658萬股，金額亦有645萬元，在噚日跌幅榜中排第2，相當觸目。
唯冠在過去12個月內，股價由唔夠0.30元，炒到上去最高1.26元。早排急跌後，仍見有間星洲證券行密密收集，當時小初重以為大戶收貨，所以先至愈收愈低，但噚日龐大沽盤中，就見到呢間星洲行大舉沽貨。
如果冇搞錯，呢間星洲行今次沽貨價，應該較入貨價為低，若佢哋都要蝕錢走人，事件肯定唔簡單，基於呢位長期支持者掉轉槍頭，觸發更多沽盤。
經紀陳話，唯冠將於本月30日公布全年業績，據聞盤數唔多好睇，但之前一直冇先兆，直到近日先至隱約透出風聲，導致揸重貨者非常失望而沽貨。但究竟盤數點解搞成咁，佢就話未收唔到風。
慕容小初