何韻詩與劉浩龍曾多番傳出緋聞，不過仍無礙兩人交往，日前他們結伴到跑馬地一間超級市場狂掃飲品及即食麵，其後何韻詩更前往劉浩龍位於跑馬地的寓所消遣。
同屬新秀歌唱比賽出身的何韻詩（阿詩）及劉浩龍，兩人近年屢次傳出緋聞，但他們的感情並未有因此而受損，日前何韻詩更不避嫌與劉浩龍逛超市掃貨，其後並前往對方的跑馬地住所消遣。
當日下午二時許，阿詩與助手及劉浩龍一行三人到跑馬地一間超市shopping，阿詩頭戴七彩冷帽，一身「牛記笠記」，衣着簡便，而劉浩龍則戴上一頂橙色鴨舌帽，穿上運動裝及板仔褲，他們購買了一些零食、飲品及即食麵等。
三人在收銀處排隊時，阿詩更不停講電話，直至劉浩龍付款後，他們便步往劉浩龍位於附近的名仕閣寓所，沿途阿詩與劉浩龍並沒有理會途人的目光，照樣有講有笑，表現十分投契。
事後阿詩接受記者訪問，她說：「我哋不嬲都係朋友嚟㗎啦，嗰日我係陪吓佢買嘢，買乜就唔記得啦，之後我哋上咗佢屋企坐咗陣，傾吓偈咁囉！」
阿詩表示不擔心上劉浩龍屋企會令緋聞傳得更盛，她說：「我哋冇理呢啲新聞，我哋自己知乜事就得啦，亦唔會理其他人點揣測，要驚人哋點睇而冇咗自己朋友嘅話，我唔會囉！」
而劉浩龍昨日在電話中亦笑說：「阿詩上嚟傾吓偈，都好平常，我唔怕傳緋聞，傳嚟傳去都係呢個啫！」