恒指升131點，距離1萬大關只係相差147點，長和系做火車頭，好友踢多一腳，恒指有機會見5位數。
長實（001）升1.25元，和黃（013）亦係。政府托地產市嘅方案就嚟出台，地產股可睇好一線。兩隻熱門長實Call輪，9515升13.4%，9517升7.2%，兩隻輪上禮拜同價，𠵱家追貨，9517抵過9515。
太古A（019）係綜合企業股，但亦有相當地產成份，收34.40元，升幅3.3%，重勁過地產股。太ACall輪真正可以買賣嘅得隻9475，明年5月到期，現價40仙，溢價7.2%，槓桿率8.6倍，吼住正股回吐時，執啲9475玩短線。
中銀（2388）本來軟軟哋，後尾喺滙豐（005）帶動下，勉強升5仙收市。渣打（2888）招股，反應麻麻，有啲心理影響，但個市如果向上，中銀點都會跟住上，只不過速度會慢啲。
中銀Call輪不妨收集吓，對象為9462同9550。9462大成交，明年7月到期，現價12.1仙，溢價4.8%，槓桿率6.7%。9550成交少啲，明年3月到期，現價70仙，溢價7.4%，槓桿率11.6倍。想賭大波幅，則揀9458，明年2月到期，現價21.7仙，溢價12.7%，槓桿率37.3倍。
章盛