賓架C睇完十月二十四日蘋果頭版新聞（路祥安回朝），打電話嚟問：「喂，蘋果李慧玲報道，信唔信得過？」左丁山話：「記者就係好資深，聽講有好多政治線，佢寫得咁明白，應該事前仄得好清楚。」賓架C話：「咁即係點？」左丁山答：「即係可信囉！」
點知下午開會之後，返到辦公室，收到賓架C嘅秘書小姐傳真，就係一份政府新聞公報，否認蘋果日報報道（原文係：今日蘋果日報有關路祥安的報道絕不正確。）搞邊科呀？睇完為之一頭煙。跟住賓架C電話到，佢陰陰笑咁話：「重以為你好識得分析㖭，咪一樣踩中西瓜皮！」左丁山惟有死撐：「政府梗係咁講啦，拭目以待。」
呢鋪輸到面懵懵，唔敢再同賓架C講落去，做政治新聞唔同做娛樂新聞，態度要嚴肅啲至得，千祈唔好收到小小風就以為係八號風球打到嚟。賓架C原來亦有八卦料講，佢話：「我噚晚去君悅酒店開波、賀浙江第一銀行孔祥勉博士成為TheLegionHonneurClubHongKongChapter嘅會長。好多名人參加晚宴，浙一重有不少高層出席，當然唔少得孔博士兩位公子Leo同LeRoy。會上有人報訊，話林在山已經有喜，孔博士同林山木都快抱孫嘞。」左丁山即刻問：「你啲消息係唔係同路祥安回朝嘅報道差唔多？」賓架C話：「唔使十個月你就知啦！」