余文樂、陳冠希、蕭正楠同麥浚龍（Juno）四個成日傳不和，如果佢四個合作拍部戲，肯定會有噱頭。王晶一向好有生意頭腦，馮仁昭聽聞佢最近有部戲《初吻凌晨兩點半》就係想撮合佢哋四個合作，不過Juno係客串啫！王晶重定咗由成日對余文樂黑口黑面嘅陳冠希做主角之一。
東方魅力已經分別同蕭正楠、余文樂傾過吓，兩邊都好似冇乜問題，可能因為余文樂經理人張國忠同StarEast關係好，所以點都會畀面。
呢部《初》片原本籌備好喺下個月開拍，不過StarEast啲股東對呢部戲嘅成本同賣埠能力始終有保留，所以要再諗諗，不過王晶就算開唔成呢部戲，要撮合佢哋四個合作都唔會係難事。
陳文媛（BoBo）嘅新大碟《bounce》啱啱推出，佢想個唱片封套要與眾不同，特別喺影相嘅時候一路跳彈床一路影，希望可以營造動感嘅效果。BoBo除咗跳彈床之外，重唱啲感人嘅歌去感動fans，佢話：「喺新碟度其中有一首叫《嫲嫲》嘅歌曲，主要係描寫我同嫲嫲嘅感情，𠵱家我哋重一齊住。」難怪BoBo演繹呢首歌嘅時候，唱得咁投入啦！
三人男子組合E-Kids前日喺荃灣首播佢哋隻新歌《初哥》MV，吸引幾百個歌迷到場支持。講開佢哋呢隻新歌MV，原來係由攝影師夏永康執導，重喺韓國取景。E-Kids前日嘅宣傳活動，重邀請咗李蘢怡到場助陣，佢哋又一齊跳舞唱歌，現場歌迷都睇得好開心。
台灣天后蕭亞軒前日喺廣州出席《蕭亞軒演唱會2002》VCD簽名會，吸引咗幾百個歌迷到場圍觀。蕭亞軒同現場嘅歌迷大玩唱歌鬥長氣嘅遊戲，然後又幫歌迷簽名。
蕭亞軒日前以國語講：「我一共替大家簽了約二百個名字，一點都不倦，見到內地歌迷對我這樣熱情，真的又開心又感動。」
李蘢怡（Tiffany）噚日喺銅鑼灣出席「SonyEricsson"Live"」開幕典禮，記者問佢會唔會去拜祭羅文，Tiffany話：「始終同佢唔相識，費事畀人覺得好似博影相、博宣傳咁，我覺得呢啲行為好唔要得。」
陳小春日前接受新城《娛樂一早》訪問，喺節目入面主持問小春學揸綿羊仔係咪同蜜運有關，小春直認不諱話：「Yes，Bingo」。不過，小春亦再次強調同Marianne（緋聞女友王敏慧）只係朋友階段，重話對方已經有男朋友，唔會撬人牆腳，做出一啲令對方男友唔舒服嘅事，因為佢好保護同Marianne嘅感情。