譚惠珠身為大律師，語出驚人，話明唔支持二十三條立法嘅法律工作者，不配做中國公民。呢啲係文革時代邏輯，嗰陣時凡係唔支持毛澤東言論嘅，就係反革命反共反動派，要被批鬥，打落十八層地獄，對中共革命有大功勞嘅鄧小平、劉少奇等等都被扯落台；劉少奇更含冤而死，好彩鄧伯伯大命，生存力強，忍辱負重到一九七六年，待毛澤東死後，打倒四人幫，先至可以翻身；如果唔係嘅話，中國邊有今日咁發達。你話在「批林批鄧批孔」時期，鄧小平配唔配做中國公民呢？睇番當時嘅《人民日報》、《大公報》、《文匯報》，鄧小平當然唔配啦。嗰陣時，譚惠珠喺邊度呢？
二十三條立法名為諮詢，實際係硬銷，唔聽話就唔配做中國公民。咁大頂帽壓落嚟，邊個敢講嘢呀！唔怪得陸羽茶室嘅老牌大侍應阿發叔都話自己係無知之輩，不敢請葉劉淑儀去陸羽飲杯茶、食個包。浸會大學教授TimHamlett喺佢嘅專欄講得妙：「每當梁愛詩周圍出動去為政府政策辯護，就係表示政府已經決定做一啲蠢事，而且唔會聽任何意見。」
梁司長一講嘢，就有咁嘅意含，大家最緊要靜落嚟。唔好喧嘩。良好中國國民係聽話嘅，熱心聽從長官訓誨嘅。就因為中國人咁馴，先至出現一位毛澤東大搞文革，連朱鎔基都要踎牛棚。