阿仙奴由個幾禮拜前嘅高峯急速下滑，連輸三場，上個禮拜六主場輸畀布力般之後，領隊雲格困住班球員響更衣室，開咗成粒鐘所謂「緊急會議」，可見事態嚴重。計我求大俠話，隊波幾場最主要係輸後防，施文始作俑者係時候唞下嘞。
自從施文屢次出洋相後，佢自己失信心不特止，搞到連隊友防守時都騰晒雞。上個禮拜周中對歐塞爾，對方知施文無信心就唔理三七二十一起勢射門；對布力般，伊度重發波瘟擺烏龍㖭。除咗施文，查實有幾件主力踢殘晒，雲格都應該畀佢哋唞唞。
而雲格對於連敗就好無奈，佢講得好妙：「我哋三場波都係輸一比二，三場對手加埋都係得八次射門，我哋就失夠六球。今場對布力般我哋射咗二十七次門，都要輸波。吹脹（呢句我求大俠加嘅）！」
上個禮拜日我哋體育版登咗韋利女友卡娜莉絲啲性感相，引起幾大迴響──有人話讚佢身材正，又有人話啲相太鹹濕。原來呢位靚女拍嘅露點掛曆相響意大利嘅反應重勁，出版幾日就響好多地方賣斷市。聽講佢呢次博出位好成功，大把電視節目同廣告等緊佢拍，相信會食住條水大玩性感。睇嚟，不嬲反對女友走呢性感路線嘅韋利有排擔心嘞。
AC米蘭件烏克蘭射手舒夫真高響上個禮拜六復出兼踢正選，結果AC就輸畀基爾禾，除咗賴佢腳頭唔好之外，我求大俠認為佢一復出就即刻同恩沙基一齊出，即刻破壞咗隊波之前嘅無敵進攻模式。計正教練安察洛堤應該搵其中一個踢後備，夾多幾場先，唔應該搵基爾禾呢種對手試，始終兩個今季未正式夾過。當然啦，AC球員有啲倦，都係斷纜主因。
真係球迷奇遇記！上個禮拜六貝迪斯作客維爾瓦，先有件華利拉俾球證趕咗出場，但上半場都入到波，到下半場連費南迪斯都被逐埋出場，得番九件就被扳平。到後來又有件菲臘斯古出埋場㖭，搞到最終只剩番八條友比賽。我求大俠唔知班貝迪斯球員因咩事咁鬼躁，淨係知買咗貝迪斯上盤嘅波友肯定成晚㷫烚烚、瞓唔着。
碧加命多官非有排煩
自從九九年掛拍之後，就經常官非同是非纏身，好似同老婆離婚爭兒女撫養權啦、私生女訴訟啦、瞞稅案啦，久唔久就上吓頭條，啱啱單逃稅案先審完，佢即刻告祖家一間互聯網公司未獲准許盜用佢嘅肖像權，索償五百幾萬美元賠償，真係佢唔煩我求大俠都戥佢煩。