上禮拜五，大隻藍籌中，和黃（013）醒目，最低49元，踢上50.50元收市，逆市升80仙，1周共升2.60元。長實（001）上禮拜五升25仙，1周共升1.75元，跑輸和黃。相信未來幾日，長實會跑番快啲。大行出報告，猛話和黃抵買，唔記得咗個幾月前將和黃幾乎評為地底泥。
和黃升，帶動長實。另一個有利因素，係借住美股再上，港股本周三期指結算，有好大機會挾淡倉。挾淡倉，火車頭股唔會少長實嗰瓣。
睇好長實個勢，揀長實Call輪落注，對象不外乎9515同9517，數據一樣，價位相同，9515壽命長幾日。9517成交就大好多，單日59球易手，係9515嘅4.6倍，熱炒熱賣揀9517。
中共十六大下禮拜召開，中信泰富（267）要留意。明年員工減薪，對盈利有啲幫助。上半年業績大進31%，增長勢頭良好，會吸引基金落場。上禮拜五跌30仙，全周並無進帳，短線有機會炒落後。
揀中信Call輪炒，熱門貨係9298，明年6月到期，現價15.6仙，溢價14.4%，槓桿率10.9倍。短期輪則揀9037，下月夠鐘，現價26.5仙，勝在溢價得0.9%，而槓桿率則有6.4倍。兩隻都諗得過。
章盛