上個星期四，一班嘩鬼直闖旺角街頭，小朋友𠵱嘩鬼叫，學生妹嚇到爭相走避！
今個星期四萬聖節前夕，一定重有更多妖魔鬼怪四圍走，事關今年萬聖節產品特別多搞作，繼上年拉登面具全城大熱後，今年又有血漿刀同眼火爆面具接棒，扮鬼扮馬包你開心一晚！
記者：尹珊珊
攝影：黃子偉、陳智良
Models：Jovi、Irene、Sammy（fromSunSpot）
1.走鬼眼面具$149.9(b)
鬼怪面具中，骷髏頭面具一向最煞食，加埋一對活動眼珠同血盆大口，驚嚇之餘又生猛！
2.巫婆長裙$109(a)
以絹質製成的巫婆長裙，紅黑兩色夠搶眼，扮鬼都咁靚，背後可綁帶調校闊度，肥瘦身形都着得，購買時再送你一頂巫婆帽，毋須自行配搭。另備有童裝size，適合4至8歲小朋友。
3.女巫長指手套$59.9(b)
傳說中巫婆都留有又長又彎的指甲，要扮得維肖維妙，梗係要加埋呢對長指手套，手指位零舍長，乍看幾可亂真，共有紅、綠兩色。
4.奪命狂呼血漿刀$74.9(b)
新一代膠刀不但外形似到十足，重加埋內置假血漿，郁一郁就有血水流動，夠晒暴力，又唔會太墜手！
1.眼火爆面具$249.9(b)
萬聖節面具多以骷髏頭和鬼怪為主，小丑造型較罕見，最抵死是這個面具內有一條吸管連接假眼球，戴上後只要輕輕吹氣，一對滿布血絲的眼珠即時彈出，名副其實的眼火爆。
2.吸血殭屍袍$109(a)
這件絹質製的吸血殭屍袍有黑領和紅領，袍身有全黑和全紅，略嫌太過單調，可揀背後印有巨型蜘蛛網或南瓜圖案的，另附送假牙及假血漿。
3.滴血手套$99.9(b)
效果與奪命狂呼血漿刀相似，只需揮動雙手，藏在假手骨內的血漿會瞬即流動，驚嚇不足，搞笑有餘。
4.長柄大鐮刀$39(a)
可拆成兩截的膠製長柄大鐮刀，輕身方便，細路仔都玩得。
1.攝青鬼面具$20(c)
青必必的攝青鬼面具，好似好驚嚇，睇真啲個口笑騎騎，即刻變搞笑版，面具既無套頭咁焗身，又唔怕整亂頭髮。
2.魔女袍$109(a)
修身設計的魔女袍，質料較令身和柔軟，凸顯了女性的魔鬼身材，加上兩邊手袖剪得破爛的細節，以及黑襯紫的顏色配搭，感覺較女性化，可加一件薄身黑色衫打底。
3.夜光骷髏手套$49.9(b)
想在萬聖節前夕群鬼中突圍而出，就要戴上這對立體骷髏骨手套，具有夜光功能，離遠都可以睇到。
4.發聲大斧頭$29(a)
骷髏骨斧頭的手柄上設有開關掣，開啟後即發出陣陣「鬼叫咁聲」，內置的小燈泡又會閃閃吓，帶出街一定可以引人注目，兩嚿2A電已經可以玩足全晚。
店舖資料：
(a) 店名：ROSE
電話：27429818
地址：荔枝角青山道489-491號香港工業中心C座地下世紀廣場C7號G室
(b) 店名：玩具反斗城
電話：27309462
地址：尖沙嘴海運大廈地庫032號舖
(c) 地址：灣仔太原街77號攤檔(街口第一檔，卓悅化妝店隔壁)