男子組合E-Kids前晚喺無綫電視城錄影音樂節目《勁歌金曲》，估唔到呢隊新組合嘅歌迷都幾瘋狂，佢哋知道偶像會喺電視城出現，就去嗰度等偶像，但現場竟然有五個E-Kids嘅fans圍住問途人攞錢搭車返屋企。
嗰五個E-Kidsfans見到途人就話：「我哋冇錢返屋企，我哋住天水圍，可唔可以畀錢我哋返屋企？」結果，有十個途人因為心軟而畀錢。當記者影呢班歌迷嘅相時，佢哋好抗拒，重猛用粗口鬧記者，佢哋話：「影乜×嘢相，E-Kids唔講粗口咩？」
而E-Kids對於歌迷嘅行為就話：「我哋都見過歌迷喺屋企出面等到好夜，佢哋又話冇錢，咪畀咗一百蚊佢哋搭車，亦試過有歌迷嘅媽咪搵我哋勸佢個女唔好逃學。」至於歌迷話偶像都講粗口，E-Kids話：「呢個fans支持我哋有限啦，我哋點會講粗口？」
韓君婷噚日一身樽領背心去蘭桂坊出席義賣日活動，佢好神氣咁話：「𠵱家瘦咗，真係乜嘢自信都返晒嚟，睇番自己之前啲肥妹相，我下定決心唔會畀自己再肥落去。𠵱家啲衫由大碼變細碼，我試過有次着條以前肥嗰陣嘅大碼褲，去廁所可以唔使除拉鏈同除鈕㖭呀。」睇嚟佢好滿意𠵱家嘅身材喎，不過點解每次出嚟都要遮遮掩掩呢？
黃秋生噚日喺中環大會堂出席「無罪最啱Feel勵志繽紛Show」，對於之前有報道話秋生𠝹女，佢就話：「其實係我同朋友食飯輸賭，我專登帶個女仔去嗰度，睇吓會唔會俾記者影到相做封面。結果做咗半個封面，𠵱家都唔知邊個請食飯。不過，呢件事我老婆都鬧我無聊。」
一個散檔樂隊嘅歌手，平時表現出嚟個樣對女朋友情深義重，外表望落亦斯斯文文。但原來佢係雞蟲一名，重要叫埋啲非常之平價嘅雞，即係深水埗同旺角嗰啲。本來男人鹹濕都唔係罪，但係佢表面扮晒專一就令人好討厭！佢個女友真係要小心啲！
張學友同陳淑芬噚日出現赤鱲角機場，佢哋啱啱喺重慶返嚟。對於網上有報道話學友上次喺武漢開個唱發生塌台意外，搞到之後開嘅演唱會批文都出問題，陳淑芬話：「唔會因為上次件事有影響，有關其他演唱會，我哋同有關機構都傾緊。」而學友就話：「演唱會都冇話要加強保安，個個演唱會都係咁。」
葉世榮、周啟生同向雪懷噚日一齊喺赤鱲角機場嘅離境大堂出現，佢哋準備出發去北京一個作曲作詞人研討會，重會順便討論反翻版問題。問到世榮啱啱辦完女友個喪禮，心情平復咗未？佢話：「我心情都OK。」睇嚟世榮已經收拾心情，再次投入工作。