特區兩位女悍將因二十三條俾人當過街老鼠追打，八方聽聞，詩姐姐對於當日出席報業公會活動時，俾新聞界啲問題搞到頭都大埋，覺得好委屈，畢竟自己花咗唔少時間去準備篇講稿，但係人人只講「頭上把刀」同埋「小偷論」，重有專欄作家改咗個「梁一刀」嘅花名畀佢，真係激死梁司長。於是乎詩姐姐下定決心，從今之後，收埋把刀唔再講，實實在在，正正經經做法律條文。
其實，詩姐姐並非第一個形容二十三條乃頭上之刀，工團喺七月已表示擔心二十三條形同「政府放一張刀在他們頭上」，隨時都會劈下來。當時詩姐姐好聰明咁唔回應。
其後，民建聯主席曾鈺成唔知點解又引用呢個講法嚟支持二十三條立法，話「好過頭上有把刀，唔知幾時跌落嚟」。詩姐姐今次俾記者再問，竟然大發「刀論」，實在不智，𠵱家吸取教訓封嘴，都算醒嘅。
傳真︰2623-9278
電郵︰