啱啱攞到入伙紙嘅何文田嘉多利豪園，上個禮拜五喺現樓搞派對。發展商請咗兩名「御林軍」，左右護法看守物業，裏面重有兩名外籍家傭把關，恍如置身十八世紀皇室貴族宮廷中，蘭西就好似公主咁，處處有人服侍。
主人家包括嘉華地產董事總經理呂耀華同總經理文靜芝。負責呢個項目嘅文靜芝，心情大靚，成個下晝好似花蝴蝶咁，帶住班傳媒滿場飛，睇完八樓示範單位，又去廿一樓睇另外一個，然後再到會所。
兩名雄赳赳屹立大門兩旁嘅「御林軍」，又頓時令蘭西想起英國白金漢宮門外站立嘅御林軍，係威係勢。細問下，呢兩位臨記，企一日可有幾千蚊落袋，重唔使好似真嘅御林軍咁唔准郁。咁好搵，搞到蘭西心思思想做番一兩日兼職！
舉行嘉年華會已成樓盤宣傳的指定動作。九倉深井碧堤半島開售一個月以來，每個周末均邀請外籍美女，以唔同服飾及造型亮相。過去兩日就借用集團請嚟為旗下尖沙嘴商場LCX，開幕禮表演嘅英國NottingHillCarnival團中成員，唱歌跳舞表演助興。
九倉黃光耀企喺以蝴蝶、鮮花造型嘅表演者中，頓成綠葉，應晒俗語所講「牡丹雖好，都要綠葉扶持。」
內地房地產熱，連北京都好似上海咁來港招商，本周二起在港舉行嘅「第六屆北京香港經濟合作研討洽談會」，就推出一批項目招商，其中西城區佔四十六個房地產項目，地盤面積近二千萬呎，可建樓面三千幾萬呎。
聽講西城區今次用金融街、商務街等，六個大區嚟細分呢四十六個項目。當中商務街區，港人熟悉嘅九龍倉一早已有項目投資，包括北京首都時代廣場，系內嘅LCX零售店，下個月就喺度開張。另外，北京馬哥孛羅酒店嘅商務樓層剛投入服務，最近重攞獎㖭。
新世界中國喺內地嘅土儲係港商之冠，有兩億方呎，認真嚇人。重點城市之外，連較少港商投資嘅遼寧省大連同瀋陽市，佢哋都有地產項目。蘭西八到，新中冇雷公咁遠走去投資，原來同遼寧省長薄熙來有關。
當年薄熙來重係大連市長嘅時候，曾帶隊嚟香港招商，新世界主席鄭裕彤親自招待佢，重落實投資。估唔到十年後大連嘅住宅發展得咁好。
𠵱家薄熙來已榮升遼寧省省長，證明新世界當日都好有眼光。不過新中地區總監（瀋陽）劉松燦嘅來頭都唔細，係瀋陽市政協委員。講番薄熙來，係已故中共元老薄一波個仔，後台唔弱㗎。
周末唱K，除去各大旺場外，新樓盤售樓處都有得玩，唔使畀錢兼有獎品。南豐發展嘅小欖浪濤灣，過去兩日舉辦「浪濤之Sing卡拉OK大賽」。參觀人士可上台獻唱，重有紀念品，唱得好嘅，更有名貴獎品㖭，總值都有幾千銀㗎。附圖中兩位小花，面對鏡頭從容自如，唱K功力不凡。
最近經常北上嘅長實趙國雄，噚日同蘭西講，內地豪宅會所設計裝潢質素，好多已經超越香港，有點不是味兒。所以要利用長實九龍塘畢架山一號豪宅作大反擊，準備淨係擺設就花上過千萬，打造一個中西合璧嘅住客會所，會買幾幅嶺南派國畫點綴。點解揀嶺南派？老趙話鍾意呢種夠創新有風格嘅畫風。唔怪得知佢賣樓咁多古靈精怪的招數啦！
佢重話蘇富比會喺今日拍賣一批嶺南派畫家嘅佳作，噚日有去參觀，諗住今日投番幾幅㖭，當然唔係佢去舉手啦，驚畀人知長實投嘢會托價呀嘛。咁西方色彩又點？好簡單，就係去歐洲觀摩酒店的設計，實行倒模咁倒。
蘭西
電郵地址：