周潤發醉心攝影，更有人主動聯絡他開個人影展，但發哥謙虛認為自己未夠資格，所以拒絕了。不過早前他到北京獵影的作品，今日首度在本報曝光，其中以一幀驢仔相最為吸引。
周潤發近年來醉心攝影，為了方便沖曬菲林，他在家中特別闢了一個黑房，另外又買了大批攝影器材。而早前他到北京與當地攝影名家交流，對他的攝影技巧亦得到改進，發哥到過長城拍照後，又在北京到處攝影，破村的老婆婆、小孩子、母雞、粟米和梨子都成為了他的獵影對象。
對於發哥所拍的照片，記者找來專業攝影師德哥評價，在數張的作品中，德哥最欣賞發哥所拍的驢仔照片，他說：「可能發哥比較喜歡拍風景照，所以佢拍人物反而唔及拍動物同風景好，嗰張驢仔相，佢好識運用光線，構圖又豐富，以一部儍瓜機影到咁嘅水準，我覺得發哥影相都相當到家，繼續落去，將來佢喺攝影方面一定會更有成績。」
而發哥下一個想去攝影的地方是黃山，他日前說：「中國可以影相嘅美景真係多到講唔晒，我啲拍友已經游說我去黃山影相，因為嗰度啲風景真係靚絕，所以我都好有興趣，不過美國嗰邊有工作要做，我都唔知可唔可以成行。出年我要去美國拍西片，所以應該冇咁多時間！」
發哥在近年來所拍的照片已超過幾百張，曾經有人要求為他辦個人攝影展，但他說：「雖然我鍾意影相，但講到要開影展，就真係未夠資格，我𠵱家都係學習期，將來等我真係認為可以見得人，先至考慮啦！」雖然發哥謙稱未夠班開影展，但他在北京以Contax2.8光圈的儍瓜機所拍下的照片，讀者就有機會率先看到。
採訪：陳月媚