響即將舉行嘅第36屆日本東京車展，雖然係以商用車為主題，但場內仍有不少概念車展出，相信會惹來不少車迷注視；而日產車廠亦唔例外，響會場內亦將會展出全新BeeLine概念車，其汽車加辦公室嘅一體化概念，相信會成為未來汽車設計嘅新趨勢。
呢部BeeLine概念車嘅造型雖然看似一部貨車，但頗Cute嘅車首設計卻予人有另一種味道；廠方除為其採用電動雙趟門組合，令乘客上落車時變得方便容易外，尾門亦可作半開合式，以便響狹窄嘅環境下提存儲於尾廂嘅貨物或物件。車廂布局亦以多變為賣點，其中第二排座椅可收摺放平，以增加尾廂載物容量外，全新CARWINGS系統更可提供高速上網及與辦公室嘅電腦連接起來，車頭表板更可向左拉長，配合電腦鍵盤及螢幕而變成一個流動辦公室㖭！但由於廠方未有公布關於此車嘅機械資料，有興趣嘅朋友就要留意有關新一屆東京車展嘅消息喇！