打機撞鬼任食任拎　忽然嚇你一驚

注意，上網吧打機，隨時撞鬼！
萬聖節，旺角有網吧搞非一般Halloweenparty，身穿小鳳仙、和服、旗袍的俏女鬼會事先匿埋，一見你打機打到入晒神又或者瞌眼瞓，就第一時間閃出嚟，喺你耳邊大嗌一聲：「你撞鬼呀！」雖則搞笑，但失驚無神俾人嚇一嘢，你都咪話唔驚！

記者：陳漢榮　攝影：陳子良　化粧：Olivia（BridalImage）

「Halloween，間間場都開Party，我點都要搞啲嘢整旺個場。」問因何有此「搞鬼」構思，「數碼戰區」老闆Martin解釋：「講新，我個場唔算新，講大，我間場又唔係最大，不過勝在喺度返工嘅女仔全部係青春活潑口靚妹仔，好多客經常買埋早餐、消夜上嚟請佢哋食，又問班女仔攞電話，既然係咁，不如扮吓俏女鬼，一來可以搞吓氣氛嚇吓班客，二來俾個機會班客𠝹吓女囉！
「不過事先聲明，啲女仔唔會着到鬼咁Sexy，所以唔好期望有着超低胸短裙嘅女巫、蜘蛛精、白骨精出現，簡簡單單玩吓和服、小鳳仙、旗袍Look已經OK，化埋個嚇人妝，已經夠煞，佢哋會喺適當時候閃出嚟，希望畀到『驚』喜大家，至於攞唔攞到班女仔嘅電話，靠自己喇。」

玩叉頸
阿儀攝手攝腳爬上卡位，從上而下玩叉頸，正聚精會神打機的Sky（17歲）：「我一早知你哋喺出面扮鬼扮馬影相，但估唔到你真係會爬上嚟嚇我，老實講真係俾你嚇倒。」

玩搭膊頭
Rebecca扮鬼搞笑有餘，驚嚇不足，兼且露出馬腳，阿豪（18歲）：「一早知你喺後面搞搞震喇，見你咁靚女先詐諦俾你嚇，第二個我開踭九年嘞。」

玩尖叫
Lina話要揀個樣蠢蠢嘅客仔嚟玩，豪仔（16歲）不幸成為犧牲者，被一聲尖叫︰「你撞鬼呀！」嚇窒，豪仔話：「唔係吹水，我真係俾佢嚇到彈起！」

旗袍俏女鬼
Lina（17歲）：「我日頭返學，夜晚先嚟網吧返Part-time，好多客都讚過我靚女，一星期至少有10個男仔問我攞電話，如果見無惡意嘅，我都會畀嘅，當識多個Friend囉。」

和服俏女鬼
阿儀（17歲）：「哎吔！我覺得個妝太爆喇，搞到今日俾啲客狂瘀，重笑我樣衰㖭，平時好多男仔成日故意親近我，某幾個重周不時大獻殷勤，買消夜畀我食㖭。」

小鳳仙俏女鬼
Rebecca（20歲）：「我幾鍾意個小鳳仙裝，Halloween着成咁搞吓鬼都幾爆，不過先此聲明，人鬼殊途，我係女鬼，唔好𠝹我！搵第二個喇，呢度大把靚女。」

小資料
日期：10月30及31日
時間：8:00pm至2:00am
收費：每小時$8，3小時$20
店名：數碼戰區
地址：旺角亞皆老街24至26號東方大廈3樓（泰林側）
電話：23932088
坐位數目：75