經過早個星期嘅減價風潮後，剛過去嘅周六周日，香港車市又回復平靜，正好係休養生息之時嘛！其中，最值得飲番杯落會係日產嘅ChiuSir，事關今趟Prairie減價一役，不僅爭番口氣賣過200車，未受對手冧價影響之餘，重睇到有唔少忠實Fans響背後默默支持㖭！再者，雖然March同Prairie備受同級對手抗衡，銷量未見突出，但位處頂級豪華MPV之列嘅新款Elgrand，銷量卻節節上升，推出至今幾個月經已賣過50部車以上，睇嚟口碑重會帶動唔少車迷嘅留意㖭！唔知係咪咁嘅緣故，亞Mark聽聞代理靜極思動，正有計劃搬舖作招徠，聽聞佢哋會將原有位於銅鑼灣嘅陳列室，搬落去現代位於灣仔嘅舊Showroom，毗鄰咪係積架囉！話晒係香港區嘅汽車一條街，左鄰右里不少都係汽車陳列室，自然會較現時響銅鑼灣嘅Showroom會有更多買車嘅人流啦！