尖沙嘴漆咸道嘅玫瑰堂噚日好熱鬧，除咗一班虔誠嘅教徒外，重嚟咗大班記者，原來小超人李澤鉅中午做完彌撒後現身門外，佢代表長實集團同李氏家族，向玫瑰堂捐出一百二十萬元，支持該堂重修。小超人本身並唔係天主教徒，點解捐錢？皆因屋企人囉。
小超人話：「我同教會一直關係都好好，太太、屋企人都係天主教徒，呢間教堂係舊嘅建築物，的確需要維修……我細女都喺呢度洗禮。」但小超人噚日冇帶埋一對囡囡出席彌撒，「因為唔想佢哋見報。」
而李太王富信本身係虔誠天主教徒，「我讀幼稚園已經係教徒。」李太喺李生旁邊，噚日就只係講咗呢一句。
原來玫瑰堂建立於一九○四年，係九龍半島歷史最悠久嘅聖堂。記者問到小超人生意嘅嘢，佢就話：「今日係禮拜日，喺聖堂面前唔講樓市喇……今日係禮拜日，我唔講公事喇，你地都放吓假啦！」
（圖）小超人同曾慶文神父（左）一致地雙手互握，李太王富信就笑得好開心。 程志遠攝
傳真︰2623-9278
電郵︰