小初今年初誤信經紀陳，佢話耀科國際（143）個舊主席好快會現身，以消除大眾嘅疑慮，於是喺30仙水平坐咗多少貨，點知上個月終於紙包唔住火，原來耀科個舊主席，因為涉嫌喺大陸瞞稅被人拉咗，搞到股價勁插，小初輸鋪勁。
但經紀陳噚日竟然斗膽舊事重提，重話有人斟緊想搞番起隻股，小初輸過錢，點都唔敢食回頭草，但由於生性八卦，都想聽吓佢哋有乜法寶。
經紀陳話，佢聽聞幕後揸fit人，走到濠江搵幫手，想話度水同重新埋班炒番起隻股。此外，耀科已經做咗唔少功夫，例如升咗3位老臣子出任董事，以示公司冇咗舊主席一樣掂。
小初心諗，咁都叫做積極做嘢，只不過好過撒手唔理。
老老實實，舊主席被人拉同埋要賠過億銀呢件事，實在令隻股嚴重內傷，好多以前捧過場嘅芬佬，一早已離場，就算有新水炒作，由於餘悸猶存，想話引人落叠確唔容易。
慕容小初