各國領導人同CEO日日喺墨西哥APEC開會，佢哋嘅跟得夫人就悶到發慌，八方見到滙豐銀行主席艾爾敦夫人同董建華夫人趙洪娉齊齊去行街。董太應該係識途老馬，因為八方前日同老董傾起，原來佢哋一家人曾經喺十年前坐郵船遊埠，喺洛斯卡沃斯上岸。老董話當時租船出海，重釣到一條成三呎長大魚，諗番起都好回味。
無巧不成話，老董十年前到呢個墨西哥城市度假，住嘅酒店同今次一樣都係Palmilla，佢話唔係刻意安排，只係同呢間酒店有緣。
講開酒店，墨西哥當局話就話保安嚴密，人人進入酒店時都要經過安全檢查，不過香港團就發現Palmilla安檢人員，半夜竟然收晒工，酒店變成無掩雞籠。香港團同智利團住埋一齊，八方估計當局認為呢兩個團受到恐怖分子襲擊機會唔大，先至會有所鬆懈。
傳真︰2623-9278
電郵︰