呢排狀態回勇，唔再係發福萬人迷嘅里安納度狄卡比奧（LeonardoDiCaprio），今年聖誕檔期撞啱有兩部戲《GangsofNewYork》同《CatchMeIfYouCan》一齊上畫，原本兩部片都係聖誕日推出，不過最後《Gangs》都提早五日上，費事同《Catch》硬拼。
《Catch》呢部戲重有湯漢斯（TomHanks）做FBI探員同史提芬史匹堡（StevenSpielberg）做導演，陣容認真鼎盛。其實之前都有報道話里安仔喺戲入面扮演嗰個真有其人嘅天才罪犯法蘭，會用唔同身份呃錢，而我羅拉早幾日睇完個新預告片之後，都覺得阿里安仔嘅表現幾生鬼。
里安仔喺戲入面扮飛機師、醫生同律師，個個造型都鬼咁神氣，不過到最後走投無路，又變番着住件污糟背心嘅窮鬼，佢俾湯漢斯追嘅時候，重衰到要喺飛機底爬出嚟鬆人。
其實里安仔唔止騙財，重騙埋色，佢扮機師嗰陣就冧空姐，做醫生嘅時候就連護士都滾埋，佢同個護士搞嘢嗰陣重興奮到頭髮都戙起晒，問你服未？