墨西哥度假勝地洛斯卡沃斯，因為開APEC（亞太經合會議），呢幾日極為熱鬧，一街都係CEO，八方淨係交換卡片都換到手軟，噚日收到一張「長江實業集團總裁楊一鳴」嘅卡片，重以為李嘉誠請咗個新頭馬，睇真啲至發現此長實設於遼寧，同香港長實無關。而楊總裁間長實，個寶號由書法家啟功所題，同李超人嘅「長江一號」好唔同。
八方問楊總裁，佢話公司喺九五年先至成立，專門搞地產，因為仰慕李超人，所以連公司名都照抄。楊總話當年查過內地無禁止以「長江」為名作商業登記，但logo就唔用得人家嘅。八方即時想起，難怪長實在內地發展地產項目，好多時都用和記黃埔嘅名義，睇嚟可能係費事幫人宣傳。
楊總裁喺墨西哥冇機會見到李超人，但就見到小小超李澤楷。據楊總裁話，小小超一見到佢張卡片，反應同八方一樣，都係打個突，之後聽到楊總裁話係佢老竇頭號fans，即刻四萬咁口。
傳真︰2623-9278
電郵︰