如果不是「劍擊」，這兩個女孩子應該這一世也不會認識。
在年齡上，一個三十三歲、一個二十歲；在外形上，一個嬌媚、一個豪爽；一個已為人妻七年、一個仍在求學中。大纜拉唔埋的兩個人，前者是香港劍壇出了名「靚女」何嘉麗，後者是剛在釜山亞運會中初露頭角的楊翠玲，不少人說楊翠玲是何嘉麗的未來接班人。那天難得兩人均拿着自己擅長的劍，便裝一度，一五一十談談對對方的感受。
圖：黃賢創 文：徐嘉華
嘉麗--佢好男仔頭
翠玲--有啲偶像feel
嘉麗：翠玲個人好豪爽，唔扭擰，幾男仔性格。劍擊方面，佢學嘢好快，好似教練教一啲新嘅協調動作，佢都好快上手，加上佢學劍年齡比我細，基本功唔錯，又有速度，只欠一啲經驗。
翠玲：最初（約九九年）喺隊見到嘉麗，唔係好敢同佢講嘢，對佢有高高在上嘅感覺，有啲偶像feel；熟絡咗，都可以同佢傾到嘢。好欣賞佢集中精神打劍，我以佢為目標，希望將來做到佢嘅成績。
嘉麗--我好啱玩
翠玲--先慢後快有挑戰性
嘉麗：我覺得自己好啱玩重劍，我為人比較沉實同冷靜。更加享受嗰種等待時機刺中對方嘅感覺。
翠玲：我鍾意有速度感，所以曾想玩花劍或者佩劍，但係教練揀我玩重劍之後，發覺重劍原來係先慢後快，打法要有耐性、等時機，很有挑戰性的運動。
嘉麗--佢可能係
翠玲--有壓力
嘉麗：翠玲有可能係我嘅接班人，不過要睇佢明年畢業後可以放幾多時間喺打劍上。
翠玲：話我係嘉麗嘅接班人，我會有少少負擔同壓力。因為要做到佢嘅成績（包括九四年英聯邦劍擊錦標賽個人銀牌、九七及九九年亞洲賽個人銀牌等）唔容易。不過，我決定咗目標，希望先喺明年亞洲賽攞個人獎牌，再喺未來嘅亞運會攞個人獎牌，亦渴望有一日能參加奧運會。明年畢業後，我或者會花幾年時間做全職運動員，睇睇成績點再打算。
嘉麗--好想參加奧運
翠玲--希望佢可圓夢
嘉麗：我話咗退休好多次，每次都係唔甘心，兩年後嘅奧運我好想參加，但係我要睇睇隻左腳韌帶傷可唔可以頂埋奧運，反正今年我已經再冇比賽，稍後同教練商量先決定。
翠玲：我唔想嘉麗𠵱家就決定退休，我重有好多嘢要向佢學習。唔敢叫佢再玩下屆亞運會，但係覺得佢可以打多一次奧運（指○四年希臘奧運），實現夢想後再離隊才圓滿嘛！