酒會上碰到新聞界老總C，在場者亦有幾位老總，大家都埋怨有線電視對商業用戶嘅收費，絕不便宜。左丁山在辦公室好想睇電視，更想裝上有線，但每個月要畀二千幾蚊，覺得幾奢侈噃，一直都唔捨得，假如月費降至一千以下，相信好多中環辦公室都會做有線訂戶。律師洪間律師樓夠威水，兩個拍乸房入面都用Plasma電視睇有線新聞，羨慕死左丁山。
諗起屋企裝有線，廳一部、房一部，每月付費近六百元，有啲肉痛噃，問老總C：「點解唔可以主機收正價，房間拖線就減收五折呢？」老總C話：「唔係話你冇道理，但係有好多人唔老實，影響ARPU。」（按：即係averagerevenueperuser，每用戶平均使費）。
都唔知佢講乜，轉過身來，碰到對電子裝置好熟行嘅史提夫，向佢請教。史提夫話：「聽講六月世界盃㷫烚烚之時，新界好多村屋要求增加駁線，駁多一兩條在睡房。你知啦，第二條線在月費方面已經有優惠，係平啲嘅，有線有生意自然照做。但後來駁得太多，不免有啲懷疑，於是搵人去了解市場。哎吔，原來啲村民太聰明，識得搵人番嚟將屋內嘅有線第二部機拉過去隔籬屋，非有線訂戶在附近人人可以睇世界盃！」哦，原來如此，有線收費高係防止聰明人取巧，但就益唔到我哋呢啲老實人，真唔抵。