大市呢幾日嘅走勢非常奇怪，成日都係同美國嗰邊相反，結果冇人敢伸手出嚟，大市每日成交額平均都係得50零億。
個市走勢咁怪，其實要多得班Trader唔少。有班做開芬嘅朋友同伏勝講，之前啲大行係咁叫佢哋買貨，佢哋因為見美股唔係好掂，所以冇理到佢，但係當美股企穩之後，班Trader就開始挾倉，希望可以迫班「芬佬」出嚟買貨。個朋友話，如果再升多一二百點，相信喺無可選擇嘅情況下，都會買番啲貨嚟戥住個倉，所以可能重有得升。
民企愈搞愈大鑊，好多原本諗住今年會再炒一炒民企股嘅錢，喺歐亞（932）出事之後苦無出路，結果好多錢走番晒入去啲細價股度，令到呢幾日股仔成交額大番之餘，亦有番啲升幅，就好似隻淨係做電訊同媒體科技嘅21世紀通（241）咁，唔聲唔聲已經升咗去0.27元。
聽朋友話，隻股會有啲嘢搞吓，似乎係同賣走部份業務有關，重可以有錢入帳，雖然話有番多些少現金，但係間公司喺現有股東入主後，業績冇乜睇頭，如果今次炒上去，真係要走得有咁快得咁快。
至於隻招緊股嘅中國電信（728），喺正個市唔就嘅時候嚟上市，有人嫌隻股水位唔多，又話隻股個價低過一蚊美金，有好多外資大芬唔可以買，所以有好多人都唔係咁睇好。不過，伏勝聽啲同承銷團相熟嘅友好講，情況並唔係咁差，特別係將個上限價定喺1.69元呢個水平，除咗炒上落特別容易之外，每手價值重只係三千四蚊左右，啱晒散戶嘅口味，各位如果有心抽股嘅朋友不妨去馬，估計每手都應該賺到餐晏仔嘅。
伏勝