啱啱同太太黃慧寶結婚兩周年嘅陶大宇，屋企最近多咗一個新成員，不過，大家唔好以為佢靜雞雞做咗人老竇，佢只係早排買咗隻古代牧羊狗啫。早幾日喺跑馬地，馮仁昭就有幸同大宇屋企嘅新成員見面，原來大宇幫佢隻古代牧羊狗改咗個名叫大佬，大佬一見馮仁昭，就好興奮咁飛撲埋嚟，嚇到馮仁昭死死吓，但大宇就話：「唔使驚，佢唔會咬人㗎！」
大宇話大佬都幾難服侍，佢話：「大佬雖然好乖，但就好怕熱，為咗佢，屋企二十四小時要開住冷氣。」睇嚟大佬真係好識歎！
大宇同大佬散步之餘，都講到籮記病逝嘅消息，佢話讀訓練班嗰陣，籮記已經係天王巨星，但就好遺憾從來冇機會同籮記合作過。佢話原本都想去籮記靈前鞠個躬，但係因為同籮記唔熟，驚俾人話博上鏡，所以或者會送個花圈致祭都唔定。
名模Rosemary噚日去咗尖沙嘴出席「LCX大型零售店開幕派對」，佢着咗件低胸衫出現。大會重安排港台DJ范振鋒喺Rosemary身上畫畫，結果范振鋒就喺Rosemary條頸度畫咗一條頸鏈同埋一粒大鑽石，范振鋒話：「Rosemary着咗件低胸衫，我畫嗰時都唔敢正面望佢。」梗係啦，如果Rosemary唔介意，相信佢阿媽都會出聲！
林敏俐、左慧琪、胡家惠、保采芬同蔡潔雯等五個港姐，噚日喺荔枝角公園出席活動。冠軍林敏俐早排返美國探親，順便填寫當地嘅報稅表，而當地市長重特別頒咗個獎表揚佢當選港姐冠軍，林敏俐話：「我喺香港同美國都要交稅，所以連港姐嘅獎金都要報埋，使唔使計就要問吓先知。」
啱啱度過二十二歲生日嘅林敏俐話：「嗰日同屋企人一齊食飯慶祝，冇乜特別感覺，連港姐都選埋，所以都冇乜特別嘢想做。」
呂方同麥家琪噚日喺跑馬地出席新片《情迷個半月》嘅開鏡儀式，麥家琪喺套戲入面飾演呂方嘅老婆。呂方話遲啲會學女友鄭裕玲一樣考電單車牌，佢又話：「我哋遲啲會去意大利旅行，到時會一齊揸電單車。」而麥家琪話：「《情迷個半月》遲啲要返內地拍攝，我嚟緊都接咗啲數碼電影，都會去廣州開工。」