寶蓮寺封山事件得以解決，有份斡旋嘅鄉議局主席兼立法會議員劉皇發，噚日出席佢立法會同僚丁午壽同張宇人嘅辦事處開幕時，笑容滿面，但佢就同八方話自己係鍾無艷，重噏咗句「有事鍾無艷，無事夏迎春」。八方問發叔點解，佢就解釋話：「鍾無艷係打仗嘛，為咗香港解決問題，我都願意做呢個角色，不過冇事呢，就唔好搵我嘞！」哦！原來係咁，八方重以為政府「過橋抽板」㖭。
發叔又話，今次同孫公（房屋及規劃地政局局長孫明揚）一齊去寶蓮寺斡旋，係因為孫公同佢識咗幾十年，佢重話孫公「識貨」，「識得搵佢」。連喺隔籬食緊菠蘿包嘅經濟發展及勞工局局長葉澍堃聽到都要加把嘴，大讚：「發叔樣樣都好嘢。」
講到菠蘿包，葉局長話佢已經一個月冇食過，所以即場食番個補數，佢重叫八方都整番個㖭，真係唔話得。
傳真︰2623-9278
電郵︰