辣正好代表着有線貓女MayWong，外表衣着性感的她，身材惹火夠晒火辣，原來其飲食口味亦與辣有關，任何辣嘢都鍾意食，可謂無辣不歡，當中最愛就係辣椒炒蟹。問她最愛哪間食肆的炒蟹，May即時答：「我煮嘅辣蟹係最好味，個個試過都話正！」小記抱住懷疑嘅心態，試試May的炒辣蟹係咪真係咁耍家。
記者：區佩嫦
攝影：周旭文
呢味炒辣蟹，由May至愛的蟹及辣椒結合而成，May因為太愛食的關係，平均每個星期都整番隻嚟歎，至於辣嘅程度就令小記咋舌。「平日我會落30隻指天椒，每次爆指天椒時，辣味攻到走出廚房。今次忍手落咗12隻就真係無乜料到！」嘩，小記食少少已經變孖膶腸嘴，30隻指天椒？真係唔講得笑。
呢味辣蟹係May的招牌菜，每次整辣蟹畀朋友食，個個都讚不絕口，有班朋友重食到上癮。「佢哋久不久就會專登搭車入嚟屯門叫我買蟹炒畀佢哋食，結果就一齊再去元朗街市買蟹，真係俾佢哋激死！」可見May炒蟹的廚藝如何超卓，絕對是一味傍身，世界通行。
材料：
肉蟹 2隻、指天椒 10隻、洋葱 1個、薑 4片、蒜頭 4粒、葱 2棵
小記試味
只係食咗個蟹箝啲肉，個嘴已經又紅又腫，啲蟹肉真係幾嫩口，除咗過辣之外，小記真係無乜嘢可以踩，一個字講晒：「正！」
做法：
小貼士：
小記最驚啲蟹張箝舞爪周圍郁，May就教小記先用筷子用力直插蟹的蟹奄中央的心臟部位，隻蟹就會死，點厲害嘅箝都無用武之地。
阿May經常會參考食譜學習各式各樣的美食，這味辣子雞丁就係從食譜中學習的。這款菜式簡單易做，將雞丁炒完燜一燜就得，只需半個鐘就醃好炒好，夠晒方便快捷，May放工後經常煮嚟做消夜，唔Heavy，又可吊吊辣癮。
小記試味
味道唔錯，啲雞丁入味之餘又幾嫩滑，少少辣易入口，大人細路都啱食。
材料：
雞柳 2件、嫩薑 3片、紅辣椒 2隻、蒜頭 4粒
做法：
每次May買餸都會揸住佢架Benz由屯門去到元朗同益街市，車程大約10分鐘，雖然唔係幾方便，但佢就好享受揸車買餸嘅樂趣。由於每次都要顧住架車，所以May多數都唔會同老闆吹水，買完就即刻鬆人，費事俾警察叔叔抄牌，變相有牛肉乾「加餸」。
肉蟹膏夠軟
May本身鍾意食肉蟹多過膏蟹，點解？因為貪肉蟹嘅蟹膏較膏蟹軟，行咗幾檔海鮮檔睇清楚後，May一於決定喺呢間海鮮檔買肉蟹，雖然籮內嘅蟹隻隻都咁生猛，不過May本身就鍾意揀大隻嘅蟹，貪佢肉地夠厚，啖啖肉夠好食。
至激指天椒
買完蟹當然要買最重要的材料就係辣椒，今次煮嘅兩款餸分別要用指天椒同普通紅椒，兩款辣味唔同，May話指天椒的辣味霸道啲，至於普通紅辣椒則辣中帶鮮甜，而佢本身就鍾意食指天椒多啲，貪佢夠勁夠辣。