備受車迷注目嘅第49屆澳門格蘭披治大賽車，將會喺嚟緊嘅11月16及17日舉行，其中尤以東望洋大賽至為矚目；正如早前我哋曾經報道過，上屆冠軍得主兼寶馬車手許士文（DuncanHuisman）、以標緻306作戰車嘅長人車隊車手拿達活（C.Nattavude）等車手，將會於今屆嘅賽事中爭奪冠軍寶座外，另外重有不少著名車手都會參加是次賽事，當中包括有早前新聞多多，並以福特Focus作戰駒嘅香港著名車手李萬祺、響亞洲房車賽中獲得頗佳成績，及駕駛標緻306嘅芬蘭車手韋高侖（ToniRuckonen）、由日本車手谷口信輝駕駛嘅豐田Altezza，同埋以寶馬320i作戰車嘅德國車手梅拿（JorgMuller）等等。相信屆時每位車手都會以最佳狀態迎戰，以求在賽事中取得好成績。
戰車方面，除有大家熟識嘅寶馬320i、標緻306、福特Focus、本田Integra等等外，今屆重會有多款新車參賽；而最矚目嘅相信會係響東望洋賽道上，首次出現嘅愛快147及標緻307戰車。有興趣到現場觀賽嘅朋友，可致電澳門旅遊詢問處（電話：28572287）查詢有關票務方面嘅資料；另外亦可Click入佢哋嘅官方網頁（網址：