《三更》出碟真係快，筆者呢頭喺戲院睇完佢尾場，隔幾個禮拜喺碟場又話見面喇！
相信冇睇過呢套片嘅人，都應該對此片由港、泰、韓三地導演合作拍攝略有所聞吧！個人較喜歡陳可辛的《回家》都算拍得幾詭秘。今次《三更》DVD都算幾落本，三套戲分為三碟獨立包裝！不過叫價就冇預期咁貴，原價應該喺$120水位，但旺角、深水埗開始有舖頭做$108！淨係計碟錢都值！
又係減價消息，PARMOUNT嘅DVD同VCD今個星期做大特價，將好多$128水位嘅3區，全部跌到落$68-$88左右，執平嘢又係時候！
今次減價DVD片種，大大話話都有五、六十套，當中經典DVD正碟，筆者首推《職業特工隊》1及2集（$68）、《天煞-末日反擊戰》（$68）、《雷霆救兵》（$88）、《追擊赤色十月》（$68）同《殺人硬件6.7》（$68）等！想執平嘢可以去旺角一帶DVD碟舖蒲吓。
電話：23965321
地址：旺角花園街75-77號花園商業大廈9樓903室
今個星期行碟場時，俾我見到隻韓版《花樣年華》（$160），賣相非常靚仔，薄身鐵盒設計，DVD重要係細碟，真係非常的骰骨子！同套戲個Mood襯到絕，喜歡此劇嘅人，絕對必買！
另外，重有一單懷舊嘢！尊達拉華特經典飛仔之作《油脂》同《周末狂熱》（$125），早兩個星期真係周圍都賣到斷晒貨，大家等咗咁耐，今個星期終於有新貨返，要買嘅就快手，唔好次次等冇貨先搵呀！
文：硬碟