新車速報：
新版豐田Corolla加Kit變跑車

想唔到Facelifted新版豐田Corolla，響上星期正式推出之後，不但銷售成績理想，代理方面亦已為其推出一系列改裝配件，以饗車迷需要；今回呢部Corolla，除加裝有原廠AeroSportPackage嘅套件外，另外重有頭燈燈眉、透視油箱蓋及車尾定翼等等，睇落係咪好有跑車Feel呢？
記者、攝影：黃凱穎
新車售價：$139,900（自動波豪華版）　
車輛提供：皇冠汽車（28661020）

車廂配備豪華齊全
車廂部份與原有型號一樣，同樣以豪華實用為主，除裝有承托力極高，兼有頗佳手觸感嘅真皮座椅外，車廂四周更備有桃木裝飾，望落豪邁氣派十足；一體式中控台上亦有齊各項設備，如高級音響及原廠冷氣等等，享受至高。就連全新半皮半桃木軚環，亦有兩種顏色選擇，以切合不同用家嘅口味㗎！

引擎輸出動力足
然而，呢部咁有跑味嘅Facelifted新版Corolla，仍以一台1.5公升引擎作動力核心，並附有豐田獨有嘅VVT-i技術，可有既好力又有低耗油量嘅表現外；出色懸掛系統加上15吋輪胎組合，循迹性之高予人有莫大信心。當然唔少得重有四輪碟式制動跟ABS系統，亦可有收放自如嘅效果呢！

加裝包圍型盡全場
Facelifted新版Corolla外形改動雖然唔係太多，依舊以圓渾車體示人，但裝上呢套包括有頭尾泵把擾流器、霧燈、車身兩側裙腳及時款鬼面罩嘅AeroSportPackage，加埋車尾定翼、頭燈燈眉、透視銀影油箱蓋及車門雨擋，再響原有四輪15吋跑車合金胎軨，同埋全新HID頭燈組合襯托下，從而令新車造型倍添有一份跑味呢！

1.車頭泵把裝有擾流器及霧燈，有型又有款。
2.頭燈裝有燈眉，吸引度十足。
3.透視銀影油箱蓋，搶眼奪目。
4.車身兩側裝有裙腳，可有更見靠貼地面之感。
5.車尾設有定翼，能有助增強行車穩定性。
6.全新車尾泵把擾流器，令造型更見跑味。
7.全新半皮半桃木軚環備有兩種顏色選擇，以切合不同要求。