保安局局長葉劉淑儀噚日出席中大新亞雙周會，同千幾名中大學生真情對話，學生分別就《基本法》二十三條立法及兩大合併問題，向葉太質詢，雙方舌劍唇槍，場面都幾火辣。不過，當被學生問及作為局長嘅苦與樂時，葉太亦流露咗佢強悍外表背後，體恤下屬嘅感性嘅一面。
統率六萬三千幾名紀律部隊人員嘅葉太話，喺咁多紀律部隊人員之中，最舒服首推消防員，因為佢哋救火形象討好，好多時喺一啲最受歡迎紀律部隊人員選舉中，都會壓倒其他同袍當選。至於成日俾人投訴嘅警察，葉太亦都幫佢哋解畫，讚佢哋日日做好多嘢，連幫阿婆過馬路、救貓等工作都會做，希望大家體諒佢哋職責上要發牛肉乾，唔好怪佢哋，亦都勸勉一眾警務人員要放低個人榮辱。
至於葉太自己個崗位，佢承認係一個「不討好」嘅「苦差事」，葉太重特別寄語自己同屬下一眾紀律部隊人員，「喺盡忠職守大前提下，個個只有努力去做。」
傳真︰2623-9278
電郵︰