日頭觀塘區是個人多車多的工業區，但一到入夜時分，這個本來熱熱鬧鬧的工業區，一下子就變成寂靜得令人有點心寒的地方，尤其是站在烏燈黑火的工廈走廊時，四周氣氛更覺陰深恐怖。今次的主角阿棠，就是在其中兩幢大廈內遇到令他至今依然記憶猶新的靈異事件……
記者：黃婉冰
攝影：黃子偉
兩年前，從事漫畫創作的阿棠還在觀塘某座工業大廈工作，而第一次令他印象最深刻的見鬼經歷便是在這裏發生。「當時的辦公室面積唔係好大，我同另一位同事嘅工作室就在老闆房斜對面，而我所坐的位置只可以見到走廊同牆，所以有人從老細房出來，必定會經過我們工作室的門口。
有一日大概六點鐘左右，我和同事兩個人坐在工作室，突然眼尾見到有個有顏色嘅人影好快咁由老闆房走出來，但當時我一啲都聽唔到有腳步聲，而且老闆又無返工，理應無其他人，我以為自己眼花，即時問隔籬個同事，點知原來佢都見到，重即時跑出去睇吓係邊個，但當佢跑出去嘅時候，佢話見到有一對藍色腳向住門口方向走，跟住就唔見咗，最奇怪係老闆房門依然鎖上。」
阿棠表示，他這個同事自小已被認定為前世彷彿和靈界朋友有緣，可以看到亦不足為奇，就在第二日，兩人就嘗試在同樣時間等鬼出現以證實前一晚所見的全是事實。
「第二日同一時間，老闆已經走咗，我哋兩個特登望住門口，點知今次真係畀我哋兩個好清楚咁見到一個透明、青青綠綠，好似有一層顏色咁嘅人影跑過，後來同事重同我講，話當佢見到個影跑過之後，對眼一直望住門口，就在綠影走咗之後，有一個透明好似煙霞狀嘅人伏在門上同佢對望咗一陣，這個人沒有任何表情，輪廓不太清楚，對望一陣之後就消失咗。」
如是者過了四、五日，每當老闆不在的時侯，這個不速之客都會在同一時間在房門口走過，阿棠都習以為常，但萬萬想不到這個不速之客原來是個徵兆。「見完第二次之後，隔咗一日又有咁嘅情形出現，今次係白色，但自從嗰次之後就無再出現過，兩個月之後，老闆因為資金問題，公司就關閉咗，當時我和同事都覺得可能公司嗰地運唔係咁好，而之前所發生嘅事可能係一個預告。」
不知是巧合還是命中注定，阿棠兩年後在同一區另一座商業大廈，又再遇上另一件奇怪的事，雖然怪事是發生在另外兩位同事身上，但現在想起依然記憶猶新。
「有晚大概11點，我同另外兩個同事諗住落樓下食消夜，當我哋行出走廊向住個𨋢方向行去時，其中一個同事突然之間向住部𨋢跑過去，跟住另外一個又跟住跑過去，嗰刻我好奇怪，於是行過去諗住問吓究竟發生咩事，點知去到只見到佢哋兩個呆咗咁企喺度，跟住我問佢哋發生咩事，其中一位同事話：
『頭先行行吓，見到有一個着住白色衫褲嘅人向住部𨋢跑過去，以為有𨋢到，咁咪追埋過去囉！但係當我去到𨋢口前面嘅時侯，我先發覺部𨋢都未落到嚟，當我望向剛才嗰個人嘅時候，我見到佢就咁樣走入隔離幅牆度』」
再細問之下，原來另一位同事當期時一樣隱約見到有人跑過，雖然遇到這些怪事，但阿棠卻表示一點都不覺得怕，因為他認為鬼魂並非如做戲般周圍害人，有時他們的出現可能只是想帶來一點訊息，既然自己沒有做過虧心事，那又何需驚慌！
與阿棠傾談，得知他原來喜歡研究不同的水晶，他說並非人人對水晶都有感覺，但若然有感覺的話，只要把水晶放在手上，便可感覺到水晶所發出的磁場，於是記者便懷着試試的心態同阿棠做了一個測試。當記者把一塊捷克綠殞石放在手掌心，阿棠用另一塊綠電氣石放在上面搖晃時，不知是心理作用還是真的「有料到」，手掌中間有少少跳動的感覺，這次可能代表着記者與這塊水晶算夾得來。
年齡不限，性別不拘，只要你願意將自己撞鬼的親身經歷公開，兼且現身說法，讓讀者分享感受，歡迎來信簡述你的鬼故事。一經採訪及刊登，必予以薄酬。
來信請連同姓名、聯絡電話郵寄「將軍澳工業邨西駿盈街8號蘋果日報副刊『盞鬼運到』玄怪自述收」;或傳真至27420542；或電郵至