港股噚日持續回軟，但跌幅仍然輕微，恒指收報9722，跌64點，成交僅46億元。港股下周三期指結算，相信好友會留番彈藥在下周二及周三開火，不過近期利淡因素頗多，要推高恒指結算唔易，其實好友能夠守在9700水平結算已算不俗，若以10月低位8700水平計，每張期指好倉合約有近千點利潤，都幾和味啦。
不過，高盛突然出口術唱淡兩大國內電訊股，重話中移動（941）與聯通（762）有20至25%下跌空間。若中移動要跌25%，即差不多要跌成5皮，相當於恒指跌逾200點，加埋其他藍籌可能會跟住跌，大市隨時要回跌500至600點。唔通高盛今次睇到有大戶換馬，沽中移動與聯通改買高息股中國電信（728）？否則有暗助中電信之嫌。
星虹控股（397）宣布取消供股，股價即大幅挾高，高見2.8仙，最多升過115%，最後收報2.2仙，升69%。終止供股傳言早在市場流傳，主要因為包銷商台証見市況差，想打退堂鼓。
據聞星虹好等錢使，無理由會咁輕易放走個包銷商。星虹今次是1供8，每股供1仙，集資2900萬元，但今次供股計劃，連大股東都冇話承諾供股，即係若冇其他股東肯供股，台証需要100%包銷，變成以2900萬元取得星虹89%股權，成為大股東，同時可以借殼上市。
其實2900萬元雖然話多唔多，話少唔少，但對有強勁背景嘅台証而言，要吞冇理由吞唔落。從星虹及台証利益角度睇，供股計劃應該無問題，阿虎真係諗極唔明點解要終止，唔通重有其他原因未浮面？
阿虎