十九歲的「阿翁」（隊友稱呼）強忍腳傷在釜山取得一面難得的亞運划艇銅牌，當她完成賽事後痛得動彈不得，要由教練背着上岸，到底這個奪牌過程有幾辛苦，現在就由翁嘉茵親身講出感受。
「賽前教練分析過對手實力，話我有能力攞牌，點知賽前三日因為趕住返去選手村沖涼同食飯，行樓梯時唔小心左腳拗柴（扭傷足踝），嗰時隻腳腫到好似有隻雞蛋喺度咁，但冇諗過放棄，因為唔想放棄呢個機會，惟有加緊治療同休息，睇吓傷勢進展先，之後再打算。」
「我喺輕量級同重量級預賽都同中國選手一組，主要策略係唔好加重傷勢。第一日兩場留力，休息多一日喺第二日預賽至搏殺，結果兩項比賽都入到決賽。」
「到輕量級決賽途中突然吹起正風，平時操練都經常面對呢種環境，本來問題唔大，但隻腳再扭一扭愈划愈痛；因為唔想家人同教練失望，惟有忍住痛繼續划。返到終點攞第三嗰時，隻腳已經痛到冇晒知覺，重喊起上嚟。」
「返上岸，過咗一段時間心情至平復，因為呢面獎牌實在得來不易，上台領獎心情特別開心。比較失望係放棄咗緊接嘅重量級決賽，如果唔係傷，我有機會攞多個獎牌，雖然係咁，但我覺得呢面獎牌好有意義。」