自早前中國宣布入世後，甫即成為全球商家嘅投資熱點，而汽車製造業亦成為「支柱產業」之一，近期發展步伐之急速，實在令人側目。中國市場被喻為係現今僅餘嘅汽車市場，而且潛質無限，估計日後將會成為繼北美及歐洲後嘅第三大汽車市場。
香港經濟一片死寂，但國內卻投資大熱，全球車廠一哄而上，新嘅投資及合作消息，日日新鮮日日新款。先係中國一汽（長春）和天津汽車合併，天津跟日本豐田汽車合作，生產T-1轎車，呢類以豐田Platz為基礎嘅1.5公升小房車，早前亦曾在珠海賽車場讓國內汽車傳媒試車。
除豐田外，萬事得亦跟一汽合作，在海南島生產Premacy及323/Familia，明年再生產Mazda6；而本田則在廣州嘅總部生產Accord及Odyssey，就連日產亦有意大展拳腳，已與東風汽車（武漢）合作，睇嚟各大車廠響中國造車或投資，將會係大勢所趨。
文：陳自齊