林家棟去年因忘替愛車買保險而被罰停牌一年，家棟今年五月復牌後，隨即四出睇車。早前他以約十八萬元購入標緻307SW旅行車，作為慶祝復牌的禮物。家棟更視此車為老婆，隔日就替「她」沖涼。
林家棟去年被罰停牌，被迫「忍手」不駕車一年，他在今年五月終於復牌，更急不及待在一個風雨交加之夜，購入令他一見鍾情的標緻307SW旅行車。
家棟近年多以好友兼師傅萬梓良送他的平治房車代步，但家棟表示不會買了新車而棄平治，他說：「有啲人覺得我揸Benz老餅，架車又大嚿，但我又唔係咁睇，Benz夠實淨，好硬鋼水㗎，安全至上嘛，坐落又舒服，所以買咗架新車之後，架Benz都會擺喺度，我重會揸㗎。」
其實家棟一直心思思想買車，早前有晚颳大風雨，他剛巧約了朋友外出，不久就看中這輛車，家棟說：「嗰日打風又落雨，我同朋友經過灣仔嘅車行時，一見呢架車就即刻落定，我最鍾意個天窗，又有感應式車頭燈同水撥，實在勁爽，無敵呀。呢架車坐到七個人，可以載埋阿媽、家姐同埋佢啲細路出街，一家人就唔使分兩部車坐啦。」
家棟笑言這輛新車是慶祝復牌的獎品，也藉此提醒自己要小心駕駛，他說：「我停牌嗰陣時，要坐巴士、坐的士同埋搭地鐵，乜都搭勻。諗番轉頭，停牌都係自己疏忽引起，所以我𠵱家會更加小心，呢架車係我老婆，我隔日就洗車，幫佢沖吓涼㗎喇。」
採訪、攝影：朱芷瑩