一位讀者潘來電郵問左丁山，「政治」個「政」字，係八畫還是九畫，左丁山以為係八畫。「政」字查字典，部首係「部」（即部），作四畫計。
另一位讀者東尼問本欄在十月十三日提過嘅《造化元鑰》可以去邊度買得到。呢本書比較僻，等閒書局未必有，但中環恒生銀行總行橫街（租庇利街）對面，有一間「上海印書館」（樓上舖書店），專賣雜書，算命八字之書特別多，你想買嘅話，可以摸上去問老闆。
另一位教授級讀者來電郵話：「美國有好多好好嘅社區學院，華盛頓州多的是，你唔好淨係介紹Foothill。」呢位L教授曾在UCLA、史丹福教書，現在到咗西雅圖，經常在網上睇《蘋果》，故此知道左丁山冒充專家，介紹加州社區學院。L教授在加州多年，當然識嘢多過左丁山好多，如果可以嘅話，請你又推薦吓吖。
《蘋果》讀者，無所不包，由大教授至中學生，由銀行大班至酒樓侍應，全部有齊，個個識得以傳真或電郵嚟畀意見，真係少啲膽汁都唔敢在名采版寫稿，如有亂噏之處，請L教授多多包涵。
L教授是一位奇人，做大學教授，亦做過電視台總裁，學識豐富，閱歷甚豐，佢現在長居美國，仍肯花時間睇左丁山蕪文，令我有受寵若驚之感。