久未露面嘅徐小鳳噚日凌晨喺跑馬地蓮園出現，同幾個朋友一齊食消夜，小鳳姐見到有記者影相，即時面露笑容，果然有巨星風範。小鳳姐比以前略為發福，不過風采依然，佢食咗菜遠排骨飯、粥同埋炸兩，臨走時重買咗成箱糖水打包，起碼有成三十幾碗，埋單成千幾蚊。
蓮園嘅老闆話小鳳姐乜嘢糖水都要啲，包括合桃露、芝麻糊、紅豆沙同綠豆沙等等，小鳳姐啲朋友幫手攞啲糖水，擺喺小鳳姐架車嘅車尾廂度，小鳳姐就做司機車埋啲朋友一齊走。佢買咁多糖水，睇嚟佢屋企重有party，估唔到小鳳姐凌晨時間重咁好精力！
二人組合Shine同李蘢怡噚日為宣傳電影《五個嚇鬼的少年》，分別喺旺角同銅鑼灣做宣傳派首映飛，重專登搵人扮木乃伊嚇啲途人，都吸引咗唔少人攞飛。重有好多Shine嘅fans喺度造勢㖭，都差唔多有成百人。而李蘢怡噚曰話：「其實我都成日去呢啲鬧市，因為我鍾意行街。」
黃家強噚日推出咗全新大碟，唱片封套俾人話似撞車，有影射謝霆鋒撞車之嫌，但家強喺港台接受訪問時話：「唔知喎，我反而覺得似蜘蛛俠多過撞車喎，個樣又唔痛苦，又唔危險。」家強自從獨自發展後，有歌迷不滿佢嘅歌路脫離搖滾一族，家強叫啲歌迷唔好對佢失信心，佢只係想多元化啫！
就嚟喺廣州開演唱會，康泰旅行社就搞一系列嘅旅行團，話可以入住F4到時住嘅廣東國際酒店，又可以參加演唱會嘅慶功宴。不過，噚日F4所屬嘅經理人公司話F4唔會入住廣東國際酒店，亦唔會公開搞慶功宴，要康泰抽走廣告之餘，重會保留追究權利。不過，康泰方面聲稱佢哋係獲得合法授權，所以唔會抽走廣告。
由葉童監製，樂隊LMF主演嘅三級電影《大你》將於本月三十一號上畫。最近葉童因為電影宣傳海報俾新巴禁貼而非常不滿。據知新巴原本畀海報貼喺灣仔嘅巴士站，不過噚日又話唔畀貼，原因係張海報上面印住「大你」兩個字，好似噴上去咁，巴士公司就話驚市民照樣學樣四處塗鴉，所以要禁貼！
陳文媛（BoBo）噚日喺紅磡接受新城電台訪問，噚日亦係BoBo新碟出街嘅大日子。問到BoBo有否送隻新碟畀緋聞男友陳冠希（Edison）？BoBo即時話：「唔知呀，唔好成日問起佢，成日拉埋我哋一齊講，好慘㗎！」睇嚟BoBo想同Edison劃清界線。至於新碟入面，BoBo有張相係戴住佢同Edison嘅卡地亞情侶手鈪，BoBo就解釋話：「嗰時冇螺絲批喺身，除唔到。」