NBA新戰衣

下個禮拜三NBA正式開鑼，如果想買件全新NBA戰衣第一時間捧自己心愛球隊場，位於旺角皆旺商場嘅「ShootingFive」相信會幫到你。　圖/文：李勇明

今次潮流特區介紹NBA系列產品，其實喺香港唔係好多地方可以搵到，事關香港暫時未有代理，要搵美國目前最流行嘅NBA產品，就只有幫襯呢類水貨店。

佐敦戰衣球迷首選
「ShootingFive」嘅老闆叫黃傑（唔係唱歌嗰個），今次佢特登搵咗現時美國最流行嘅NBA戰衣同T恤介紹畀各位。其中最受歡迎嘅球星系列，相信唔講大家都估到嘅「飛人」佐敦。佐敦系列戰衣無論係大學年代、公牛23號、夢幻一隊、公牛45號或係巫師，必定係球迷首選；緊隨其次球星重有拜恩、卡達同艾華遜。
除戰衣外，「ShootingFive」重有一系列大logoT恤發售，不過提醒大家；揀時記得要超加大碼，事關一件OverSizeT恤，外面加件全新NBA戰衣，咁樣着先係美國現時最流行嘅NBA街頭文化。