我大口羅拉睇過好多韓片，佢哋勝在內容夠豐富同夠膽試新嘢，早排推出嘅《緊急行動19》就認真夠晒頂癮嘞！
《緊急行動19》今年七月喺韓國上映，史無前例咁出動咗好多受歡迎嘅偶像歌手組合演出，好似有變性人河利秀、神話、Kang-Ta、Babyv.o.x.、FinK.L.同BrownEyes等等，淨係睇星都抵！故事橋段重爆笑，講韓國政府認為啲偶像歌手會教壞細路，又驚佢哋會喺選舉中勝出做總統，所以頒布法例要捉晒啲歌手！
呢套戲最爆笑嘅地方當然係啲歌手俾軍警拉嘅情況啦，神話同Kang-Ta俾軍警打到豬頭咁，而河利秀為咗逃亡，重走咗入男廁匿埋，兼且「扮」男人聲喺廁格大叫：「我大緊便呀！」最好彩都係BrownEyes，雖然俾軍警捉咗返差館，但因為佢哋太少上電視，所以竟然冇人認得出！