現在各大食肆都有大閘蟹供應，但品質良莠不齊。建議不如親自到老字號買蟹，再到酒家加工就最好。調查所得，尖沙嘴老字號「申聯」買蟹最老實，而且價錢比往年平近半，更有壞包換；而西貢海鮮檔煮法多，能以甜、酸、苦、辣四味炮製大閘蟹，務求將爆膏蟹煮得最惹味。
記者：梁佩芬
攝影：陳穎
揀蟹篇
要揀靚嘅陽澄湖大閘蟹，需注意以下6點：
陽澄湖的蟹種屬中大型，即約五至七両左右，如手掌般大，紮實後，腳如身的長度，腳太長或太短都有可能非正宗。
蟹殼現墨綠色，肚非全白，帶有點象牙色為好蟹，若帶有污黑色，即養殖區的水質受到污染。
腹部飽滿代表肉厚，可以用手由尾摸至頂，如呈拋物線則是最好；蟹腳屈曲後，在關節位露出蟹肉，即肌肉結實有彈性；蟹爪會郁即是生猛新鮮。
蟹殼與蟹肚之間的距離愈大，代表蟹膏愈多。
蟹厴兩旁泛紅有光澤，即是蟹膏爆棚。
如買48隻每隻七両重的原籮蟹，全籮應不少於二十公斤，買貨時可秤一秤是否夠數，因為不少奸商都將又大又細的蟹放入一籮。
「我哋賣嘅原籮蟹，之前都會先驗一次有冇死蟹，斤両足唔足；如果煮熟後，發現蟹膏顏色變得白、黑或青色，都算係壞蟹，可帶返嚟申聯，換另一隻新蟹或者退錢，全行只得我有呢個保證。今年為止，只係換咗一隻蟹；只要買返屋企後，即食或放入雪櫃，都好少機會變壞。」
食蟹篇
不酸不鹹卻帶苦澀味道，製法特別，但苦味太濃，將蟹味遮蓋，還要一路食一路飲水祛苦。
大閘蟹斬件後，蟹膏味道可滲入無味道的本地年糕之中。小記覺得最特別是年糕不爛有咬感又黐牙，與爽滑鬆軟的蟹肉相映成趣。
用黃糖及鎮江醋煮原隻大閘蟹，黃糖的甜味被鎮江醋遮蓋，吃時只有醋酸的感覺，但愈食愈開胃，小孩最鍾意其汁底，食完蟹還可撈飯食。
避風塘食物以辣椒、瑤柱、豆豉及蒜茸聞名，上碟時熱烘烘的，辣度可自行選擇，落單時說出要大、中、小辣便可以。
買完蟹除了自己落手煮外，其實亦可以搵人幫手，務求食出靚蟹鮮味，揸車去到西貢煮可以是其中嘅選擇之一。西貢最大海鮮酒樓全記老闆吳先生說，「九月圓臍十月尖」，雌蟹的腹部呈圓形，在農曆九月當造，十月就輪到尖腹的雄蟹。另外，除隔水蒸可以用七、八両重的大蟹外，若要加工炮製，每隻以不超過五両最好，因大蟹的殼太厚，煮很久才入味。不少人都說，雌蟹膏雖多，但不及蟹公香滑，尤其經烹調後，肉質爽甜有彈性。這裏加工費一律$48一碟，每碟有多少隻蟹悉隨尊便，就算一隻蟹一味餸都可以。
申聯公司
地址：尖沙嘴柯士甸路15號B地下
電話：23680520
營業時間：9:00am-12:00mn
付款方式：只收現金
陽澄湖大閘蟹售價：$3,400（48隻，每隻七両重）、$1,700（68隻，每隻五両重）、$40（一隻，五両重）、$30（一隻，四両重），買籮蟹有送貨服務，但只限於尖沙嘴及佐敦兩區；同時送香醋作食蟹之用。
全記海鮮菜館
地址：西貢萬年街87-89號地下
電話：27929294
營業時間：11:00am-12:00mn
付款方式：現金及信用卡（Visa及Master）
位於尖沙嘴一條毫不起眼的小巷內，原來有全港第一檔賣大閘蟹的老字號「申聯」，老闆朱志再憶述：「呢幾年最出名又標明最正宗嘅陽澄湖大閘蟹無論來貨同零售價錢都平咗好多，以往最貴可賣成五百蚊一斤，今年三百蚊左右就有交易。」
陽澄湖蟹𠵱家最靚
傳聞陽澄湖大閘蟹開始減產，還有哪些地方的蟹可選擇呢？朱老闆話：
「陽澄湖嘅大閘蟹唔一定係最靚，但係嗰度水質好，有監管又有系統，所以可以大量生產而出名。如果陽澄湖真係減產，我建議買太湖蟹，以往唔受歡迎係因為湖水唔乾淨，近年水質好番，產量增加及受到管制，質量較隱定；另外，十一月出產嘅蕩湖蟹肉質亦鮮甜，膏亦一樣軟滑，可以一試。」
以他的入貨經驗，發現陽澄湖大閘蟹最靚的時間應是十月中旬至十一月上旬左右，其他日子的質素比較參差。