科技股泡沫年代，曾經炒到識飛嘅榮盛科技（1166），在完成100合1併股後，股價噚日勁升34.62%，收35仙，成交就唔多，只得42萬元，擺明街貨相當乾。經紀黃話，如無意外應該係企圖踢高股價抽水。
經紀陳話，榮盛在科網股當炒年代，趁勢改科技名，並高價買入唔少無厘頭網站，由於收購以發行大量新股支付，有貨者要沽貨套現，自然令到股價長期維持1仙淨沽局面。
不過，搞咗一段長時間，有關人等終於搞掂晒所有嘢，再戰江湖。今次榮盛100合1併股，真係有好有唔好，唔好者當然係合併後股價勁插，街外小股東輸死；但另一方面，起碼發行股數少咗，要舞起隻股都容易啲。至於炒高目的為何？相信唔使畫公仔畫出腸。
另外，星虹控股（397）併股之後亦話供股，但結果供唔成，噚日復牌股價則急升69%，收2.2仙。經紀陳話，估計都係供唔成股，所以炒高股價另想辦法。
慕容小初