發覺周遭的男人變晒，愈來愈攤開來講肚腩、摸肚腩，打出個肚腩。前幾晚跟自己班仔蒲吧，F不知搞乜東東的，整晚齋企，T便衰衰的玩踼爆：「佢肥咗，唔敢坐，怕一坐條腰啲肉唧晒出來。」過了一會，腳仔軟的F借T的凳背挨挨、歇歇之際，T即時縮一縮，F唔還擊就笨：「佢咪就係驚我掂到佢唧出來條腰咯！」然後，K着我陪他過隔籬隊碗麵；那時算消夜時間，K摸住肚仔說：「呢餐係我今日第一餐，我條女要我減肥，無計。」
返回酒吧，放食飯回來的老闆甲，我撩他猜枚，他耍手擰頭：「啱啱食完飯，飲酒會大肚腩。」悶悶哋、想哨街的我就只好問老闆乙餓不餓，要不要給他買點甚麼吃的，老闆乙搓着那丁屎肉都無的肚皮說：「唔咯，今日已經食咗兩餐，怕肥。」
到再夜一點貓多一點，熟客G無啦啦扯高件衫，打出個大肚腩，面部表情相等於：你睇我（個肚腩）幾勁！刻下的F亦唔執輸，打出個肚，不過弱好很多，事關唔係坐……
記得圍內身型最fit的L說過：「男人的大忌有三：禿頭、肚腩和陽痿。」而女人的大忌，我想是皺皮、乳房下垂（和另一半陽痿）。男人和女人都一樣，最忌aging。
（編按：康妮續稿未到，暫停一天。）
容雅慧