禮拜二歐冠盃被「冷」風吹襲，冇一支主隊贏波；到禮拜三就掉番轉晒，旺主場同埋強隊。賽後AC米蘭、巴塞隆拿同埋曼聯已經出咗線，跟住兩場唔留力就勢係假。
AC教練安察洛堤重事先張揚暫時專攻聯賽㖭；你話佢寸咩，我就話係賽制畀佢哋攞正牌咁做，鬧就鬧歐洲足協啦。
我求大俠之前都講過，歐冠盃響三年前擴大規模踢兩圈分組賽後，球會收入無錯係多咗，但比賽多例行公事就少不免，所以我求大俠舉腳贊成改制。話時話，你估曼聯下場作客海法馬卡比會派咩人踢？碧咸、傑斯、巴夫斯？你就想，睇怕查域克、科東尼、列卡度，甚至啲新仔都可以過吓歐冠盃癮嘞。
有無睇前晚奧林比高斯輸畀曼聯場波？如果買咗下盤嘅波友肯定㷫晒，因為主隊成場波都踢到好似唔想贏咁，盯人唔夠緊外，就算係輸緊二比三重慢吞吞搓波，連球迷都忍唔住響場邊嗌佢哋上波，但係班球員繼續闊佬懶理。賽前傳出球員唔肯減薪同會方關係搞到喎晒，如果球員真係咁而交行貨，好離譜啫！
我求大俠早幾日曾經批評過巴塞件荷蘭兵法蘭迪保亞扮大佬，成日指手畫腳鬧班隊友，結果佢俾教練雲高爾省鑊甘嘅，重響前晚對火車頭時被巴塞球迷噓足全場。不過佢都知衰，無再響場波入面擺款，重好爭氣咁接應列基美頂入奠勝球。賽後佢話將個入球獻畀巴塞球迷，咁識做肯定攞番唔少印象分，果然係世界仔。
紐卡素半爆冷砌低祖雲達斯之後，出線重現一線生機。聽講呢場波其實唔係紐記踢得好，而係多得身價值三千幾萬鎊嘅祖記龍門保方送禮。格芬射個波確係有啲勁度，但以保方身手理應輕易化解，估唔到佢判斷錯誤，個波省到佢手底後入網。呢位意大利首號門將舊年作客阿仙奴都試過接波甩手，唔通英格蘭係佢嘅凶地？
球場暴力真係無日無之，好似噚日由山度士對柏沙度場巴西聯賽，當完場前柏沙度前鋒射成二比一，成班山度士球員衝向球證理論，投訴對方越位，成班武裝警察即刻入場鎮壓，有個山度士後衞俾警棍打中個頭後不省人事，教練李奧塊面亦俾噴霧噴中。李奧賽後就話：「呢場比賽似打仗多過踢波，唔怪得無人信警察囉。」