陳小春雖然身為公眾人物，但一樣咁鍾意行街shopping。前日下晝四點半左右，佢出席完無綫喺尖沙嘴美麗華酒店嘅記者會，就俾我哋嘅狗仔隊跟到佢走咗去尖沙嘴百利商場行街街。
小春企咗喺一間叫做RacingGasoline嘅舖頭門口，一邊睇電單車頭盔，一邊喺度咬手指，就好似小朋友見到鍾意嘅玩具一樣。
馮仁昭估計小春好想入去舖頭買頭盔，但係間舖頭要成六點先至開門，小春惟有走去附近舖頭左兜右兜消磨時間。期間，小春去咗一間飾物店睇耳環，可惜唔啱心水。小春喺商場行咗一個鐘頭左右，卒之等到間頭盔舖開門。佢喺舖頭逗留咗成個鐘頭，又左試右試，結果花咗二千五百蚊訂咗個特別版嘅頭盔，難怪小春離開嗰陣咁鬼開心啦！
人氣組合F4成員朱孝天緋聞女友楊謹華主演的電影《台北晚９朝５》，下月初喺香港上映。呢套戲嘅監製陳德森早年執導《晚九朝五》，重捧紅咗陳豪、陳小春同周嘉玲。
《台》今次加咗新元素，網路性愛及同性戀等。女主角之一嘅江沂淪同王婉霏因為扮演同性戀者，竟然被傳戲假情真。咁多位主角會喺下周三（三十日）嚟香港出席首映禮㖭。
過氣影帝近年嚟發展認真麻麻，其實要怪都怪佢幾年前當紅嗰陣太過鋒芒畢露，得罪咗有勢力嘅電影公司老闆個女朋友，搞到冇香港電影公司敢搵佢拍戲，直至早兩年先至解封。馮仁昭都聽聞呢件事，都覺得過氣影帝唔啱，答應咗拍人部戲，點知又去食第二家茶禮。電影公司老闆個女友已經好好人，盡量就佢個期，不過佢重畀氣人受，所以先會犯眾憎！
周星馳同譚詠麟噚日分別出現赤鱲角機場，佢哋都係出埠做嘢。一身便服嘅星爺由幾名助手陪住到場，對於記者嘅提問，星爺全部都冇回應，好鬼有性格。
而阿倫就話去北京錄音，之後會出席下周二舉行嘅羅文喪禮，阿倫話：「我大約去幾日，到時我應該會出席羅文嘅喪禮。」
薛家燕同歐陽震華（Bobby）一向都係無綫嘅福將，上年無綫想安排佢哋合作，不過最終都唔成事。噚日無綫再次安排佢哋拍攝《法術學堂》（暫名）節目巡禮。
家燕姐同Bobby兩個都肥嘟嘟，相當合襯，家燕姐重喺臉上貼咗一粒大癦，加埋自己額頭嗰粒真嘢，總共有兩粒，搞到佢頻頻話「露兩點」。