寶蓮寺的封山行動料得以解決，但數十年來仰息佛地營生的寺外小商戶，在特區政府大力推廣旅遊發展大勢下，將難逃被淘汰厄運，恐怕就連佛爺也難以打救這小小眾生。記者日前與寺外的五、六戶小店東主詳談了一個下午，領略到大佛腳下，寺內寺外結緣數十年的濃厚人情味。 News埋身擊專組
「有啲法師由細睇到我大㗎！」年近四十，至今昂平山中人仍叫她「阿女」的女店東說：「我細細個幾歲時，屋企已經喺韋馱殿擺地攤，一蚊包餅乾，五毫子包花生，之後喺寶蓮寺牌坊下面，自己搭竹棚上蓋擺賣，約十年前大佛開光後，寶蓮寺替我哋起咗呢啲舖位，到𠵱家都係六檔，冇加冇減。」
阿女講起寺外童年往事，愈是開心的片段，愈令她眼眶發紅。想起寺內法師及修道的姑婆，每每於法會後，拿着大袋生果祭品到寺外分給商戶的小孩吃時，她笑出眼淚來：「有蘋果啦、橙啦，芒果啦……嗰時有個芒果食，真係好開心。到𠵱家，佢哋都依然攞生果畀我啲仔女食。」
與阿女年齡相若的店東陳小姐，因為佛與善信結緣，歷久彌新，「每年暑假，都有信眾嚟寺住，做功德，有啲由細嚟到大，嚟親都會幫襯、傾偈，一年見一次，大家都好似朋友咁。」
已是第三代在寺外經營的三十歲店東龍先生，雖然喜歡到市區嘗試新食物，但對「家族店舖」感情不變，尤以自家製的山水豆腐花自豪，「用山水做，有礦物質，啲化學反應的確係唔同嘅，有乜分別我唔識講，因為味道係記憶嘛！我一食，就知道自己啲豆腐花係唔同啲！」
「Hello！有icecream賣。」六名子女均已到市區工作的七十五歲范婆婆，仍留守寺外的老舖，並且努力向遊客推銷。
她說以前寺外是一片爛地「踩到一腳泥」，後來由寶蓮寺修好，面對新發展，「我哋食佛爺嘅飯，冇飯食就政府畀飯我食囉！……怕都冇用，政府口大，我哋口細，佢最好畀面佛爺，唔係佛爺一定會『睇住佢』！」
下午五時過後，「何女」開始收舖，聽到寺內誦經聲，她說感到好舒服，「有時佢哋凌晨兩三點做早課時，我聽噹……一聲，都唔覺得嘈。」繼續一天一天的生活，是寺外商戶面對挑戰的沉默對抗。